Ҳиндистоннинг Sigachi Industries SIGC.NS кимё заводида 30 июнь куни портлаш ва ёнғин юз берди. Оқибатда ҳалок бўлганлар сони 39 кишига етди. Бу ҳақда CNN хабар берди.
Ҳодиса оқибатида завод 90 кунга иш фаолиятини тўхтатишга мажбур бўлган. Объект Телангана штатида жойлашган, ҳукумат ҳодисани текшириш учун 5 кишидан иборат қўмита тузган. Портлаш сабаби компания томонидан ҳозирча ошкор қилинмаган. Ҳалок бўлганлар сони дастлаб 34 кишини ташкил этган, лекин 1 июль куни уларнинг сони 39 тага етган.
“Ҳали ҳам вайроналарни тозалаяпмиз. Бино бутунлай қулаб тушган. Тозалаш ишлари якунлангач, яна жасадлар бор ёки йўқлигини маълум қила оламиз”, деди ёнғин-қутқарув хизмати вакили.
Полицияга кўра, ҳодиса юз берган вақтда заводда 140 дан ортиқ киши бўлган. Ҳалок бўлганлардан 25 нафарининг шахсига аниқлик киритилмаган.
“Мен ҳожатхонага бориш учун заводдан чиқдим ва кучли портлашни эшитдим. Бу худди бомба портлашига ўхшарди. Ташқарига чиқиб, қарасам ёнғин бошланибди. Унинг бир қисми мен томонга ҳам тарқалди. Девордан ошиб, қочишга эришдим. Ичкаридагиларнинг баъзилари қочишга муваффақ бўлди, бироқ кўплаб одамлар қолиб кетди”, деди 32 ёшли завод ишчиси Чандан Гаунд.
Микрокристалли целлюлоза ишлаб чиқарадиган Sigachi АҚШ, Австралия ва бошқа кўплаб мамлакатлар фармацевтика, озиқ-овқат, косметика ва махсус кимё соҳаларига хизмат кўрсатади.
Тамилнаду штатининг жанубидаги Sivakasi крекер фабрикасида ҳам 1 июль куни йирик ёнғин содир бўлган. Оқибатда 5 киши ҳалок бўлиб, 4 киши жароҳат олган.
Изоҳ (0)