АҚШ ташқи ёрдамини тўхтатиши туфайли дунё бўйлаб 14 миллиондан ортиқ одам ҳалок бўлиши мумкин. Уларнинг учдан бир қисмини ёш болалар ташкил этади. Бу ҳақда Al Arabiya хабар берди.
Тегишли маълумот нуфузли Lancet журналидаги тадқиқотда эълон қилинган. Мутахассислар 113 та мамлакатдан олинган маълумотларни тақдим қилган. Унга кўра, АҚШ Халқаро тараққиёт агентлиги (USAID) маблағлари 2001—2021 йилларда ривожланаётган мамлакатларда 91 миллион ўлимнинг олдини олган.
Тадқиқотда мазкур молиялаштиришнинг 83 фоизга қисқариши ўлим даражасига қандай таъсир этиши прогноз қилинган. Жумладан, бу 2030 йилга келиб 14 миллиондан ортиқ ўлимга сабаб бўлиши мумкин. Бу рақам 5 ёшгача бўлган 4,5 миллиондан ортиқ болани ёки йилига 700 мингга яқин бола ўлимини ўз ичига олади. Таққослаш учун, Биринчи жаҳон уруши пайтида 10 миллионга яқин аскар ҳалок бўлганди.
USAID маблағлари айниқса ўлим ҳолатларининг олдини олишда муҳим экани аниқланган. Тадқиқот шуни кўрсатдики, USAID томонидан юқори даражада қўллаб-қувватланадиган мамлакатларда ОИВ/ОИТСдан ўлим ҳолатлари 65 фоизга камроқ бўлган. Безгак ва тропик касалликлардан ўлим ҳам икки баравар камайган.
“Молиялаштиришни камайтириш заиф аҳоли орасида тиббиёт соҳасидаги йигирма йиллик тараққиётни тўхтатади ва ҳатто йўқ қилиб юборади. Бу кўплаб паст ва ўрта даромадли мамлакатлар учун кучли ъшокъ келтириб чиқаради”, дейди Барселона глобал соғлиқни сақлаш институти тадқиқотчиси, тадқиқот ҳаммуаллифи Давиде Раселла
Январь ойида Дональд Трамп президентликка қайтгунига қадар USAID 40 фоиздан ортиқ гуманитар маблағларни тарқатган. Икки ҳафта ўтгач, Трампнинг ўша пайтдаги энг яқин маслаҳатчиси, миллиардер Илон Маск USAID’ни қаттиқ назорат остига олганини айтганди.
USAID’дан сўнг Германия, Буюк Британия ва Франция каби бир қанча йирик “донорлар” ҳам ўзларининг ташқи ёрдам бюджетларини қисқартириш режаларини эълон қилганди.
Июль ойининг биринчи ҳафтасида Испанияда БМТнинг ёрдам кўрсатиш соҳасига бағишланган конференцияси бўлиб ўтиши режалаштирилган. Юқоридаги чоп этилган тадқиқот ушбу йиғилишда ёрдам масаласига урғу бериш учун оммага тақдим этилган.
Изоҳ (0)