АҚШ Халқаро тараққиёт агентлиги (USAID) 3 ноябрь куни Наманган ва Сирдарё вилоятларининг 208 та умумтаълим мактабларига 385 минг дона дарслик ва ўқитувчилар учун қўлланмаларни тақдим этди, деб хабар бермоқда агентлик матбуот хизмати.
Қайд этилишича, китоблар USAID’нинг Ўзбекистон Халқ таълими вазирлиги билан ҳамкорликда Ўзбекистонда мактаб ўқувчиларининг таълим натижаларини яхшилаш мақсадида амалга оширилаётган пилот лойиҳаси доирасида топширилди.
Cambridge University Press нашриёти томонидан ишлаб чиқилган 10 миллион доллар қийматидаги ушбу ўқув-методик мажмуалар 5—11-синфларда информатика ва ахборот технологиялари (ИАТ) ҳамда 1—11-синфларда инглиз тили чет тили сифатида фанларини ўқитишни қўллаб-қувватлашга мўлжалланган.
Жорий ўқув йилида дастлабки тажриба-синов якунлангач, китоблар ўқитувчиларнинг фикр-мулоҳазалари асосида қайта кўриб чиқилади ва Халқ таълими вазирлиги томонидан 2022/2023-ўқув йилидан бошлаб бутун мамлакат бўйлаб барча мактабларга етказиб бериш учун чоп этилади.
Бунинг натижасида Ўзбекистонда 6,5 миллион нафардан зиёд ўқувчилар юқори сифатли дарсликлардан, ўн минглаб ўқитувчилар эса юқори сифатли қўлланмалардан фойдаланиш имкониятига эга бўлади.
«Ўқитувчилар учун ушбу юқори сифатли қўлланмалар ва дарсликлар Ўзбекистоннинг таълим тизимига билимли ва иқтидорли ҳамда ҳаётда муваффақиятга эришишга имкон берувчи танқидий фикрлаш, муаммоларни ҳал қилиш ва амалий кўникмаларга эга бўлган битирувчиларни етиштиришга ёрдам беради. Биз USAID билан ушбу пилот дастур доирасида ҳамкорлик қилишдан хурсандмиз. Мазкур дастур мамлакат бўйлаб ўқув-методик мажмуаларни тарқатишга тайёргарлик кўриш жараёнида юқори сифатли материалларнинг таълим жараёнига таъсирини баҳолаш имконини беради», — дейди Халқ таълими вазирлигининг Республика таълим маркази директори Шуҳрат Сатторов.
Хабарда, шунингдек, USAID «Ўзбекистонда баркамоллик учун таълим дастури» доирасида янги ўқув-методик мажмуаларни Ўзбекистон контексти нуқтаи назаридан баҳолаш, кўриб чиқиш ва мослаштириш бўйича Республика таълим маркази билан яқин ҳамкорликда ишлагани маълум қилинган.
USAID инглиз тили чет тили сифатида ва информатика ва ахборот технологиялари фанларининг 1000 нафардан ортиқ ўқитувчиларига янги дарсликлар ва қўлланмалардан фойдаланиш ҳамда ўқувчига йўналтирилган таълим стратегияларидан фойдаланиш бўйича тренинглар ташкил этиб, бу йўналишда уларга яқиндан ёрдам бермоқда.
Эслатиб ўтамиз, 6 август куни USAID Ўзбекистон Халқ таълими вазирлиги учун халқаро нашриётлар ишлаб чиққан иккита туркум дарсликлар учун лицензия олганини эълон қилганди.
Шу куни USAID’нинг Ўзбекистондаги миссияси директори Микаэла Мередит ва халқ таълими вазири Шерзод Шерматов DОАG (Таълим тизимини ривожлантиришда кўмаклашиш грант шартномасини) доирасида яна 5,5 миллион доллар ажратишни назарда тутувчи қўшимча ҳужжатни имзолаган. Бу маблағлар ёшларнинг ишга киришидан олдин уларнинг тадбиркорлиги ва ишга тайёрлигини ошириш учун ишлатилади.
Изоҳ (0)