АҚШ Халқаро Тараққиёт агентлиги (USAID) Ўзбекистонда мактаб дарсликларини сифатини яхшилаш мақсадида тўрт йилга мўлжалланган 29 миллион долларлик гранд маблағлари йўналтирилмоқда. Бу ҳақда «Ўзбекистон баркамоллик учун» таълим дастури Бош директор ўринбосари Зуҳра Солиева «Дарё»га маълум қилди.
Зуҳра Солиеванинг айтишича, ажратилган гранд маблағлари тўрт йил давомида ўқув-методик мажмуаларни ишлаб чиқиш, тажриба-синов ўтказиш ва нашр ишлари учун сарфланади.
«Лойиҳа доирасида тўртта йўналишда иш олиб борилмоқда. Биринчи йўналишимиз — инглиз тили 1–11-синфларни қамраб олган, информатика ва ахборот технология фани 5–11-синфларни қамраб олади, она тили ва ўқитиш саводхонлиги, математика фанлари бошланғич синф ўқувчилари учун мўлжалланган. Бундан ташқари, информатика ҳамда инглиз тили фанлари ва Кембриж нашриёти томонидан ишлаб чиқилган дарсликларнинг лицензиясини сотиб олиб, Ўзбекистонга олиб бердик», — дастур бўйича маъсул ходим.
Унинг қўшимча қилишича, ҳозирга қадар иккита йўналишдаги ишлар ўз ниҳоясига етмоқда.
Таъкидланишича, 1–4-синфлар учун она тили ва ўқиш саводхонлиги ҳамда математика фанлари бўйича янги дарсликлар ва ўқитувчилар учун қўлланмалар ишлаб чиқилмоқда.
Янги ўқув-методик мажмуалар июнь ойининг бошига қадар якунланади ва тасдиқлаш учун Халқ таълими вазирлигига тақдим этилади. USAID Халқ таълими вазирлиги билан ҳамкорликда ушбу янги ўқув-методик мажмуаларни 2022/2023-ўқув йилида Наманган ва Сирдарё вилоятларидаги 918 та мактабда тажриба синовдан ўтказади.
Аввалроқ АҚШ Халқаро тараққиёт агентлиги (USAID) Наманган ва Сирдарё вилоятларининг 208 та умумтаълим мактабларига 385 минг дона дарслик ва ўқитувчилар учун қўлланмаларни тақдим этгани, ўзбекистонлик 38 нафар ўқувчи Бўлажак лидерлар алмашинуви дастури доирасида 2006 йилдан бери биринчи марта Америкага юборилиши тўғрисида хабар берилганди.
Изоҳ (0)