Сингапурлик сайёҳлар учун Ўзбекистонга тўғридан тўғри чартер рейслар ташкил этилади. Бу ҳақда “Дунё” хабар берди.
Келтирилишича, Сингапурнинг етакчи туроператорларидан бири Chan Brothers Travel компанияси жорий йилнинг декабрь ойида Сингапурдан Ўзбекистонга тўғридан тўғри чартер парвозлар ёрдамида мамлакатга юзлаб туристларни олиб келишни режалаштирмоқда.
Ўзбекистонга тўққиз кунлик тур доирасида Сингапур ва Осиё-Тинч океани минтақасидаги бошқа мамлакатлардан келган сайёҳлар Тошкент, Самарқанд, Бухоро ва Хива каби шаҳарларга ташриф буюриб, Ўзбекистон тарихи ва маданияти, табиати ва меъморий ёдгорликлари, шунингдек, урф-одатлари, миллий таомлари билан танишади.
Чартер парвозларни тарғибот қилиш мақсадида Chan Brothers Travel Ўзбекистонга бағишланган махсус маркетинг кампаниясини йўлга қўйиш, Сингапурда ўтказиладиган туристик кўргазмаларда Ўзбекистон туризм салоҳиятига бағишланган тадбирларни уюштириш, Сингапурнинг хитой ва малай тиллардаги оммабоп радиостанцияларнинг машҳур бошловчиларининг саёҳатчилар билан бирга Ўзбекистонга юборишни режалаштирмоқда.
Қайд этилишича, мазкур ташаббус Сингапурдан Ўзбекистонга сайёҳлар оқимини оширишга хизмат қилади ва икки давлат ўртасидаги туризм соҳасидаги ҳамкорликни янги босқичга олиб чиқади.
Ўзбекистан ва Сингапур муносабатлари
Дипломатик муносабатлар 1997 йил 8 мартда ўрнатилган.
Сингапурда Ўзбекистоннинг фаҳрий консуллиги мавжуд.
Ўзбекистон Сингапурда доимий элчихона очмаган, аммо минтақавий алоқаларни кўриб чиқмоқда.
2024 йилда Тошкентда Ўзбекистон–Сингапур бизнес форуми ўтказилган бўлиб, унда 500 миллион доллардан ортиқ қийматдаги лойиҳалар муҳокама қилинган.
Ўзбекистонга 2025 йилнинг январь—апрель ойларида жами 3,1 млн нафар чет эл фуқароси туристик мақсадларда ташриф буюрган. Мазкур кўрсаткич ўтган йилнинг мос даври билан солиштирилганда 987,9 минг нафарга ёки 46,4 фоизга ошган. Сафар мақсадлари кесимида сайёҳлар энг кўп қариндошларни йўқлаш мақсадида ташриф буюрган — 2,1 млн нафар.
Шунингдек, сайёҳлик йўналишида 434,4 минг нафар, хизмат юзасидан 374,6 минг нафар хориж фуқароси ташриф буюрган. Шу билан бирга:
- тижорат — 152,1 минг нафар;
- даволаниш — 33,3 минг нафар;
- ўқиш — 7,9 минг нафар.
Ўзбекистонга 2024 йилда жами 8,2 млн нафар чет эл фуқароси туристик мақсадларда ташриф буюргани ҳақида хабар берилганди. 2025 йилнинг январь—февраль ойларида жами 1,3 млн нафар чет эл фуқаролари туристик мақсадларда Ўзбекистонга ташриф буюрган.
Ташрифи ошиб бораётган сайёҳлар
2024 йилнинг бошидан туристлар оқими ҳар ой салмоқли ошиб бормоқда. Европа иттифоқи давлатларидан 2024 йилнинг январь ойида 4 601 нафар фуқаро туристик мақсадда Ўзбекистонга ташриф буюрган. Январь—март ойларида жами 1 млн 519,3 минг нафар чет эл фуқаролари туристик мақсадларда келган.
5 ойда эса 2,8 миллиондан ортиқ чет эл фуқаролари туристик мақсадда ташриф буюрган. Шуларнинг, 10,6 минг нафари АҚШдан келган. 6 ойга келиб эса 3,5 миллиондан ортиқ чет эл фуқаролари туристик мақсадда ташриф буюрди. 1 октябргача эса жами 5,7 млн нафар келди.
Ўзбекистон Бутунжаҳон сайёҳлик ташкилотининг Сайёҳларни ҳимоя қилиш халқаро кодексига расман қўшилди. Бу билан мамлакат туризм соҳасидаги халқаро стандартларга ва саёҳатчилар ҳуқуқларини ҳимоя қилишга бўлган содиқлигини яна бир бор тасдиқлади.
Изоҳ (0)