Сўз устаси Искандар Ҳамроқулов YouTubeʼдаги каналлардан бирига берган интервьюсида қизиқчиларнинг ҳазилларини оила даврасида кўриб бўлмаслиги, кулги жамоаларидаги қизларнинг гапи порнография фильмлариникидан кам эмаслиги ҳақида гапирди.
“Бўйдоқ йигитлар ўзаро гаплашадиган гапларни саҳнага олиб чиқишяпти”
— Мен ўзбек қизиқчиларидан фақат Аваз Охунни кўраман. Уни қизиқчи бўлиб эмас, мухлис бўлиб, соф томошабин сифатида кўраман — завқланаман, ҳавас қиламан. Ҳақиқий қизиқчилик принципларига, қонун-қоидасига, қизиқчилик мактабига амал қилаётган ягона қизиқчи у бўляпти. Ундан бошқа яна ким бор? Ота-она, келин билан ўтирганда кўра оладиган яна ким бор? Менинг бу гапларимдан бошқа қизиқчилар хафа бўлмасин, қайтага ўзини тўғрилаб олсин. Касбга хиёнат қилмасин.
Аваз Охун оила даврасида бемалол ўтириб кўрилади. Бошқаларни ҳам кўрасиз, лекин ҳозир бир нима чиқиб қолмасин, деб ҳадиксираб ўтирасиз. Замонавий кулги гуруҳларини эса қўяверинг. Маданиятга, саҳнага, ўтирган томошабинга нисбатан беҳурматлик бу. У жамоалар ҳам мендан хафа бўлмасин. Улар саҳнада айтаётган гаплари ва иборалари — “кўчанинг гаплари”. Тўрт-бешта бўйдоқ йигит кўчада бир-бирига айтадиган гаплар-да. Ўшалар концертда шу гапларни айтиб чиққандан кейин, уйига бориб шуларни ота-онаси, синглисининг ёнида ҳам гапира олармикан? Гапирмайди, чунки бу беҳаёлик эканини жуда яхши билади. Унинг онаси она-ю, унинг опаси опа-ю, залда ўтирган аёллар-чи? Улар ҳам кимнингдир онаси, опаси, аёли-ку. Уларнинг бу иши саҳнага нисбатан хиёнат — шахсан мен учун шундай, дейди Искандар Ҳамроқулов.
“Миллионни миллиардга бўлиб ташлайдиган гапларим бор”
— Мен ҳам фаришта эмасман, мен ҳам бундай гапларни гапираман, лекин фақат эркаклар бўлган “тор давралар”да. Шундай гапларим борки, миллионни миллиардга бўлиб ташлайман.
Қизиқчилар жамоасидаги қизларнинг гаплари интернертда чиқиб қолади, гапираётган гапини қарасангиз, порнография фильмларидаги гаплар. Шу қизларнинг отаси, акаси бормикан? Ундайлар билан бир маҳаллада ҳам яшамаслик керак. Шунинг учун уларни кузатмай қўяқоламан. Шунда уларга нисбатан ғазабим ҳам, нафратим ҳам бўлмайди, дейди қизиқчи.
Изоҳ (0)