«Энг катта орзум — уйли бўлиш». «Қалпоқ»даги Соҳиба — Фотима Назарова қувноқ образи ортидаги дардлари ҳамда молиявий қийинчиликлари ҳақида

«Қалпоқ» ҳажвий кўрсатувидаги Соҳиба роли орқали томошабинларга яхши таниш бўлган актриса Фотима Назарова «Дарё» мухбири Наргиза Муродовага интервью берди. У суҳбат давомида нега санъатни танлагани, оилавий шароити ва уни қийнаётган муаммолар ҳақида гапирди.

— Асли Тожикистонда туғилганмиз, кейин дадам оиласини олиб Сурхондарёга кўчиб келган экан. Оилада 8 қиз ва бир ўғил фарзанд эдик. Онам бечора саккиз қиздан кейин ўғил фарзандни тилаб олган экан. Оиламиз камтарона яшарди, дадам қассобчилик қиларди.

Болаликдан Зуҳра билан қўшиқ айтишни яхши кўрардик. Дадам раҳматли тўй-ҳашамларда столнинг устига чиқариб, бизга қўшиқ айттирарди. «Ола қанот» деган қўшиғимизнинг «ошиқлари» кўп эди.Зуҳра билан мусиқа билим юртини тамомладик. Ўша йили 40 нафар иқтидорли ўқувчи Тошкентдаги санъат институтига юбориладиган бўлди. «Фақат уларнинг энг иқтидорлиси ўқишга олинсин ва институтни битиргач, воҳага қайтиб ишласин», деган буйруқ бўлди. Мен ҳам 40 нафар ўқувчи билан Тошкентга келдим ва 8 нафар абитуриент қаторида ўқишга қабул қилиндим. Аслида Зуҳра ҳам ўша йили ўқишга келиши керак эди. Афсуски, тўсатдан дадам оламдан ўтиб қолди, у қиз боши билан катта рўзғорни тебратишига тўғри келди. У тўйларда қўшиқ куйлаб, пул топарди.

«Ёшим ўтиб қолганини айтишди»

— Институтни тамомлаб, Ўзбекистон ёшлар театрига ишга бордим. Аммо бир ярим йил ишлаб ҳам ўз ўрнимни тополмадим. Шундан кейин «Ўзбектелерадио» қошида ташкил этилган хор жамоасига ишга кирдим. Саккиз йил ишлагач, оила қурдим. Фарзандларимни оёққа қўйишим керак деб 10 йил ишламадим. Кейин ишга жойлашаман деганимда, ёшим ўтиб қолганини айтиб ишга олишмади.

Раҳматли Мирза Азизовга ҳам ишга олинг, деб борганман. У «Муқимий» номидаги мусиқали драма театрида актёр штати ҳозирча йўқлигини айтиб, ёнғин назоратчиси сифатида ишга олганди. Афсуски, вафот этганидан кейин янги раҳбар Александр Бекжонов мени томошабинларни назорат қилиш вазифасига ўтказди. У ерда ҳам ишлаб юрдим. Аммо томошабинлар таниб «Сиз актриса эмасмисиз? Шу ерда назоратчилик қиласизми?» деган гаплари ўзимга ҳам ғалати туюлди. Раҳбарнинг олдига кириб «Актрисаликка қачон ўтказасиз? Тўрт йилдан бери актрисалик штатига ўтолмаяпман», дедим. Хуллас рад жавобини олгач, ишдан кетдим. Алам қилгани мендан кейин келганларнинг қанчаси актёр ва актриса штатига олинди, аммо менга келганида «жой йўқ» дейишди. Бу ҳам бир адолатсизликда...

«Оилам билан ётоқхонада ижарада яшаймиз»

— Санъатнинг ортидан пул топиш жуда қийин. Масалан, театрда ишлаганимда 700 минг сўм ойлик олардим. Ҳар куни иш. Съёмкалар эса ҳам ҳар куни бўлмайди.Шу пайтгача уй-жойим йўқ. Икки фарзандимиз билан Хадрадаги ётоқхонада яшаймиз. Бу ерда битта ёки тўртта фарзандингиз бўлса ҳам бир хона ажратилади. Учта оилага битта —  ҳожатхона ва ҳаммом. Ўн иккита хонадонга битта ошхона. Энг алам қиладигани, бу ерда машҳур, халқ қадрлайдиган ижодкорлар жуда кўп. Биргина хонага 642 минг сўм пул тўлаймиз, аммо шароитлар у қадар қониқарли эмас.Эрим ҳам топармон тутармон эмас, рўзғордан орттириб болаларимни тўгаракка ҳам беролмайман. Қизим яқинда инглиз тили тўгарагига беришимни сўради, аммо пул топиб беролмадим. Ўғлим яхши спорт мураббийига учради. Мураббий шароитимни тушунди. Ҳозирда ўғлим таэквандо билан шуғулланяпти.

«Аввалдан ‘Қалпоқ’да борман, фақат кўзга ташланмаганман»

— «Қалпоқ»чилар билан институтда бирга ўқиганмиз. Бу жамоа ташкил топмасидан аввал учта қиздан иборат «Шов-шув» кулги жамоасини ташкил этгандик. Афсуски, фаолиятимиз у қадар омадли бўлмади. Жамоа тарқалган, Абдураҳмон «Қалпоқ»га таклиф этди. «Нега аввал чиқмагансиз?» деб кўп сўрашади. Аслида жамоа билан анча йиллардан буён биргаман. Фақатгина илгари шевада гапиришимга рухсат беришмасди. Кейин сценарийлар ҳам тоза текисланарди. Ҳозир анча эркинлик бўлгани учун Соҳиба ролининг ўзига хослиги дарров сезиляпти.Менда сохталик йўқ. Гапиришим, кулишим ролда қандай бўлса, ҳаётда ҳам шундай инсонман. Шу боис кўпчилик ролимга ишонади. Ҳатто Соҳибанинг эрга тегиш орзусини амалга ошириш учун уйланмоқчи бўлганлар ҳам кўп бўлган.

«Актрисага ҳам ўхшамайман»

— Баъзан ўзимни ойнада кўриб, актрисага ҳам ўхшамайман, деб кулиб қўяман. Чунки актрисалар чиройли кийимларни кийиб, атрофдагиларнинг эътиборини тортиши керак. Менда эса ҳаммаси оддий. Шароитим бўлганда-ку, мен ҳам қиммат кийимларни олиб кийган бўлардим. Илгари тўйларда қўшиқ куйлардим. Ҳарна бу ҳам рўзғорга фойда эди. Фонограммачи ансамбллар кўпайиб кетди-ю, мендек жонли ижрода куйлайдиганларга нон қолмади. Ҳозир ҳам онда-сонда тўйларга чақиришади. Аммо барибир талаб аввалгидек эмас.

«Диплом ҳеч нарсани ҳал қилмас экан»

— Эгизагим Зуҳра Сурхондарёдаги маданият уйида ишлайди. У ҳам тўйларда қўшиқ куйлайди. Шукрки, 90 ёшни қаршилаган нуроний онам бор. Опаларимнинг бари ўзи билан ўзи овора. Ҳалол меҳнат билан ризқимни топаман деб умри ўтяпти. Оиламизда битта мен олий маълумотли бўлганман, қолганларининг ҳаммаси болаликдан деҳқончилик, чорвачиликни ўрганишган. Баъзан қийналиб кетганимда, ҳаётда диплом ҳеч нарсани ҳал қилмас экан-да, деб ўйлаб қоламан.

 «Соҳиба баъзиларни ғазаблантиради»

— Шу кунгача таклиф этилган ролларнинг ҳеч бирини рад этмаганман. Аммо режиссёрлар менга унчалик ишонишмайди. Фақат эпизод, лип этиб кўриниб, лип этиб йўқолиб қоладиган ролларни беришади. Эпизод ролга яраша ҳақ ҳам тўлашади. Феълим чатоқми билмадим, ўзим ҳам роль сўрашни билмайман. Кастинглар қачон ва қаерда ўтказилишини-ку, умуман билмайман.

Яқинда бир аёл Instagram саҳифамга «Соҳиба исмимдан нафратланиб кетяпман, илтимос, ролдаги номингизни ўзгартиринг», деб хабар юборибди. Кўнглим ғаш бўлиб қолди. Соҳиба ролини яратишдан аввал узоқ ўйлаганмиз. У орқали ақли ноқис эмас, аксинча кўнгли тоза ва самимий қиз феъл-атворини кўрсатиб беришни ният қилганмиз.

«Уйим бўлишини орзу қиламан»

— Роллар борасида орзуларим йўқ. Фақатгина ўз уйим бўлишини ва болаларимни яхши ўқитишни истайман. Менимча, тарихий ролларни ижро этолмасам керак, аммо комедияга мойиллигим жуда юқори.Фарзандларим ҳам анча улғайиб қолди. Қизим Мубина 16 ёшда, ўғлим Маҳмуджон эса 13 ёшда. Уларни институтда ўқитиш ниятим бор, аммо санъаткор бўлишларини истамайман.

Маълумот учун, Фотима Назарова 1971 йил таваллуд топган. 1991 йили ҳозирги Ўзбекистон давлат санъат ва маданият институтининг «Мусиқали драма театри актёрлиги» бўлимида таҳсил олган.