АҚШ президентининг ходимлар билан ишлаш бошқармаси директори Сержо Гор Ўзбекистонда туғилганлиги аниқланди. Бу ҳақда Times оf Маltа ва OCCRP нашрлари хабар қилмоқда.

“Сержо Гор АҚШ президенти Дональд Трамп қошидаги Оқ уйнинг кадрлар бўйича тайинлаш бошқармаси директори этиб тайинланганда, ОАВлардан бири уни “эҳтимол, сиз ҳеч қачон эшитмаган энг таъсирли шахс” деб атаган эди. Сўнгги йилларда Горнинг номи кўпроқ тилга олина бошлади, чунки у Трамп маъмурияти учун минглаб амалдорларни тайинлашни назорат қилишни давом эттирди. Унинг таржимайи ҳолидан кўп маълумотлар тез орада ОАВ орқали маълум бўлди. Фақат унинг туғилган жойи бундан мустасно эди”, деб ёзади OCCRP.
Горнинг ўзи Nеw York Post нашрига берган интервьюсида туғилган мамлакатини айтишдан бош тортиб, “бу Россия эмаслигини” таъкидлаган. Бироқ Times оf Маltа ва OCCRP Малтадаги кўчмас мулкка оид нотариал ҳужжатлар ёрдамида Гор 1986 йил 30 ноябрда Тошкентда туғилганини аниқлади. Унинг ўша пайтдаги тўлиқ исми Сергей Гороховский бўлган. Буни унинг адвокати Роберт Гарсон ҳам тасдиқлаган.
Малтадаги кўчмас мулк 2021 йилда Гор томонидан онасининг компаниясидан 268 минг долларга сотиб олинган. Нотариал ҳужжатда амалдорнинг туғилган жойи — Ўзбекистоннинг пойтахти кўрсатилган. Горнинг адвокатининг тушунтиришича, у Малтадаги уйни “оролга бўлган муҳаббати ва болаликдаги қувончли хотиралари туфайли” сотиб олишга қарор қилган
Болалигида Горнинг оиласи АҚШга кўчиб кетган, бу ерда у Америка фуқаролигини олган ва кейинчалик сиёсатчига айланган. Хусусан, у республикачилар партиясидан сенатор Ренд Полнинг офисида ишлаган, 2020 йилда эса ўша йили иккинчи муддатга қайта сайланолмаган Трампнинг сайловолди кампанияси молия қўмитасида аппарат раҳбари лавозимини эгаллаган. Шунингдек, Гор кичик Дональд Трамп билан бирга Winning Team Publishing консерватив нашриётининг ҳаммуассиси бўлган.
Изоҳ (0)