Қозоғистоннинг собиқ президенти Нурсултон Назарбоевнинг жияни Қайрат Сатибалди 1,6 миллиард долларга баҳоланган, ноқонуний сотиб олинган активларини давлатга қайтариб берган. Бу ҳақда Fergana Agency нашри хабар берди.
Қозоғистон Коррупцияга қарши кураш агентлиги собиқ президент жияни билан боғлиқ вазият ҳақида батафсил маълумот берган. Унга кўра, Қайрат Сатибалди 32,8 миллиард тенге (1,6 миллиард доллар) ҳажмидаги мулкларини давлат ихтиёрига топширган.
Қайтарилган активларга маъмурий бинолар, эксклюзив заргарлик буюмлари, ҳашаматли уйлар, квартиралар ва автомобиллар, компаниялардаги улушлар ва ҳиссалар, темирйўллар, шунингдек нақд кўринишдаги пуллар маблағлари киради. Қайтарилган пул маблағлари 661,5 миллион долларни ташкил этиб, улар Қозоғистонга Австрия, Лихтенштейн, БАА ва Туркиядаги ҳисоб рақамларидан қайтарилган.
Қозоғистонда умумий қиймати 158 миллиард тенге бўлган (330 миллион долларга яқин) 115 та объект давлат мулкига ўтказилган. Улар орасида 13 таси коттеж, 10 та бино, 13 та ер участкаси, 4 та хонадон, 3 та тижорат уйи, 2 та мадраса биноси, 2 та автотураргоҳ, 25 та комплекс, битта қурилиши тугалланмаган майдон, шунингдек, 29 та автомобиль ва бешта махсус техника мавжуд.
Қайтарилган мулкнинг бир қисми Сатибалдининг яқин қариндошлари, филиаллари ва назорат остидаги компаниялари номига расмийлаштирилган. Кўчмас мулк борасидаги ўрганишлар ҳали ҳам давом этаётгани билдирилган.
Қайрат Сатибалди автоҳалокатда ҳалок бўлган Қозоғистоннинг биринчи президентининг укаси Сатибалди Назарбоевнинг ўғли ҳисобланади. У отасининг исмини фамилияси сифатида танлаган. Қайрат Skyline Investment Company С.А. компанияси орқали Қозоғистон телекоммуникация хизматлари бозоридаги монополиянинг деярли тўртдан бир қисмига эгалик қилган. У йиллар давомида Миллий хавфсизлик қўмитасида ишлаган, сиёсат ва бизнесда фаол иштирок этган, Қозоғистоннинг энг бой одамларидан бири бўлган.
2022 йил 13 март куни тадбиркор коррупцияга қарши кураш хизмати томонидан мансаб ваколатини суиистеъмол қилиш ва “Казактелеком” пул маблағларини ўта йирик миқдорда ўғирлашда гумонланиб ҳибсга олинган эди. Эртаси куни компаниянинг капитал офисида тинтувлар ўтказилган, бир ой ўтгач эса тадбиркор назорати остидаги фирмалар “Казактелеком” нинг 28,8 фоиз улушини давлат тасарруфига қайтарган.
2022 йил 26 сентябрда суд Қайрат Сатибалдини “Казактелеком” АК ва “Транспорт сервис маркази” акциядорлик жамиятидаги ўғирлик иши бўйича олти йилга озодликдан маҳрум қилган. Тадбиркорга нисбатан жиноий даромадларни легаллаштириш ва божхона тўловларини тўлашдан бўйин товлаш айблари ҳам текширилган. У ўз айбига тўлиқ иқрор бўлиб, давлатга етказилган зарарни қоплашга ваъда берган.
Қайрат Сатибалди ҳозирда жазони ўртача тартибли ахлоқ тузатиш муассасасида ўтамоқда. Ўтган йилнинг декабрь ойида у шартли равишда озод қилиш учун ариза берган, аммо суд аризани “маҳкумнинг хатти-ҳаракати шубҳали” дея тушунтириш бериб, рад этган.
Изоҳ (0)