Қозоғистон собиқ президенти Нурсултон Назарбоевнинг жияни Қайрат Сатибалдидан давлат фойдасига 44,6 миллиард тенге (98 миллион доллар) мусодара қилинди. Бу ҳақда Коррупцияга қарши кураш агентлигига таяниб, “ТАСС” хабар берди.
Сатибалди давлат маблағларини ўзлаштирганликда айбланиб, олти йилга озодликдан маҳрум этилган. Маблағлар давлатга етказилган зарарни қоплаш учун республика бюджетига йўналтирилган. Январь ойида ҳам Қайрат Сатибалди1,4 650 миллиард тенге (1,4 миллиард доллар) маблағни давлатга қайтаргани маълум бўлганди.
Қайрат Сатибалди 2022 йил март ойида “Казахтелеком” алоқа операторидан маблағларни ўғирлаш ва мансаб ваколатини суиистеъмол қилишда гумонланиб ҳибсга олинган. Назарбоевнинг жияни “Казахтелеком” акцияларининг 24 фоиздан ортиғига эгалик қилувчи Skyline Investment Company S.А. офшор компанияси асосчиси бўлган, деб ёзади “Орда.кз”.
Ўша йилнинг сентябрь ойида Сатибалди мансаб ваколатини суиистеъмол қилиш ва икки компаниянинг маблағларини ўғирлашда айбдор деб топилган. Унинг мол-мулки мусодара қилинган, ўзи эса муайян лавозимларни эгаллаш ҳуқуқидан маҳрум қилинган ҳолда 6 йилга қамалган. У айбини тан олган ҳамда Марказий транспорт сервиси ва “Казахтелеком” компанияларига етказилган зарарни қоплаган, бу эса жазони енгиллаштиришга сабаб бўлган.
2023 йил декабрь ойида Сатибалди шартли равишда озодликка чиқиш тўғрисида ариза берган, аммо суд уни рад этган.
Изоҳ (0)