Украина ҳозирда Россиянинг Курск вилоятида 1000 квадрат километрдан ошиқ ҳудудни назорат қилмоқда. Бу ҳақда Украина бош қўмондонлиги берган маълумотга асосланиб, BBC нашри хабар берди.
Украина ҳарбий қўмондонлиги Курск операцияси 7 кундан бери давом этаётганини хабар берган. Вилоят ичкарисида йирик рус ҳарбий қисмлари кеч жойлаштирилгани учун Украина бригадалари вилоятда мустаҳкам ўрнашишга улгургани айтилган.
Украина бош қўмондони Александр Сирский Россиянинг Украинадаги икки ярим йиллик босқини энди унинг ўз ерларига қайтаётганини айтган. Мавжуд вазият туфайли Россия истаса ҳам Курскдаги украин бўлинмаларни тезда йўқ қилолмаслиги таъкидланган.
Рус маҳаллий нашрларига кўра, Россия ҳукумати ғарбий вилоятлардан аҳолини эвакуация қилишни фаол давом эттирмоқда. Ҳозиргача 121 минг киши кўчирилган. Яна 59 минг кишини кўчириш режалаштирилмоқда.
Курск маҳаллий губернатори ҳудуддаги 28 га яқин қишлоқ Украина қўшинлари қўлига ўтгани, 12 нафар тинч аҳоли вакили ҳалок бўлгани ва вазият оғирлигича қолаётганини хабар берган. 12 август тунида украин бўлинмалари Курск ичкарисига 30 километргача кириб борган.
Кремль расмийлари 2 мингга яқин фуқаро Украина босиб олган ҳудудларда қолиб кетгани ҳақида хабар берган. Айни пайтда улар билан боғланиш учун ҳеч қандай имконият мавжуд эмас.
Россия ҳукумати Курскка кирган украин батальони 1000 нафар аскардан иборат эканини билдирган. Украина томони эса бу баёнотни рад этиб, аскарлар сони бир неча минг нафарга етишини айтган, аниқ рақамлар ошкор қилинмаган.
Айни пайтда минг километр квадрат ҳудудда украин бўлинмалари мустаҳкам ўрнашгани маълум. Улар стратегик нуқталарни, жумладан Суджа газ тақсимлаш пунктини эгаллаб олгани боис қарши ҳужум уюштириш кечикмоқда.
Изоҳ (0)