Ўзбекистонда валюта тушумининг бир қисмини мажбурий сотишдан бўйин товлаганлик учун маъмурий жавобгарликни бекор қилиш кўзда тутилмоқда.
Амалда бунинг учун мансабдор шахслар БҲМнинг 8 бараваридан 12 бараваригача (3−4,5 миллион сўм) жаримага тортилади. Бу жаримани бекор қилиш кўзда тутилган қонун лойиҳаси Қонунчилик палатаси депутатлари томонидан биринчи ўқишда қабул қилинди.
Валюта қимматликлари, қимматбаҳо металлар ва қимматбаҳо тошлар муомаласи билан боғлиқ муносабатларни такомиллаштиришга қаратилган қонун лойиҳаси билан Жиноят кодекси ҳамда Маъмурий жавобгарлик тўғрисидаги кодексига қимматбаҳо металлар ва қимматбаҳо тошларни қонунга хилоф равишда олганлик ёки ўтказганлик учун маъмурий ва жиноий жавобгарликни назарда тутувчи қўшимчалар киритилмоқда.
Шунингдек, қонун ҳужжатларидаги валюта қимматликлари, қимматбаҳо металлар ва қимматбаҳо тошлар соҳасидаги тушунчалар ўзаро мувофиқлаштирилмоқда.
Бош прокуратура ҳузуридаги Иқтисодий жиноятларга қарши курашиш департаменти бошлиғи Шамсиддин Соҳибназаровнинг маълум қилишича, 2020 йилдан буён қимматбаҳо металлар ва тошларнинг ноқонуний муомаласи билан боғлиқ 99 та ҳолат аниқланган. Ҳуқуқбузарликлар натижасида 44 миллиард сўмлик олтин, кумуш, олмос ва зумрадлар мусодара қилинган.
Янги қонун лойиҳаси валюта, қимматбаҳо металлар ва қимматбаҳо тошлар соҳасидаги қонун ҳужжатларини бир хилда қўллашга, ҳуқуқбузарликларнинг барвақт олдини олишга қаратилган.
Изоҳ (0)