27—29 июнь кунлари Венецияда Амазон асосчиси Жефф Безос ва собиқ тележурналист Лорен Санчеснинг тўйи бўлиб ўтмоқда. CNBC хабарига кўра, байрам учун тахминан 50 млн доллар сарфланган.
Никоҳ қасамёди маросими 27 июнь, жума куни Сан-Жоржо хусусий оролида бўлиб ўтди, деб ёзади The Guardian. Daily Mail нашрининг ёзишича, Лорен байрамда 27 та либосини алмаштириши лозим.
Уч кун давом этадиган тадбирга 200 га яқин машҳурлар ва бизнес-элитанинг вакиллари, жумладан, президент Дональд Трампнинг қизи Иванка Трамп ва унинг турмуш ўртоғи Жаред Кушнер, Билл Гейтс, Опра Уинфри, Леонардо Ди Каприо, Ашер ва Кардашьянлар оиласи таклиф этилган. Меҳмонлар орасида Орландо Блум ҳам бор эди.
Интернетда дам олиш кунлари Венецияга келаётган таниқли шахсларнинг суратлари тобора кўпайиб бормоқда. Қайд этилишича, аксарият меҳмонлар аввалроқ хусусий самолёт, яхта ва вертолётларда етиб келган. Reuters маълумотларига кўра, Венециянинг энг ҳашаматли бешта меҳмонхонаси, жумладан, Cipriani ва Aman меҳмонларни улар учун банд қилинган.
Асосий тўй маросими кеча, 28 июнда шаҳарнинг шарқий қисмидаги Арсенал тарихий кемасозлик ҳудудида бўлиб ўтади. Аввалроқ тўй тантанаси Каннарежо тарихий ҳудудидаги Scuola Grande della Misericordia собиқ мактаби биносида ўтказилиши режалаштирилган эди, аммо маҳаллий аҳолининг норозилиги сабабли маросим бошқа жойга кўчирилди. Тўй кунлари Безосга қарши чиққан баъзи фаоллар қайиқларнинг меҳмонларни ташишига тўсқинлик қилиш учун митинглар ўтказмоқчи.
Фото: “Правила жизни”
Фото: “Правила жизни”
Намойишчиларнинг эътирозлари фақат тўйга эмас, балки шаҳар ҳокимиятига, хусусан, Венеция мерига ҳам қаратилган. У 2024 йилдан буён коррупция айблови билан тергов остида. Намойишчиларнинг таъкидлашича, у “шаҳарни Безосга сотган”, илгари эса шахсий манфаатлари учун инвесторларга ерлар бериб келган.
Forbes маълумотларига кўра, дунёдаги энг бой одамлардан бири, бойлиги 230 млрд долларга баҳоланаётган Безос тўй шарафига бир қатор хайрияларни амалга оширмоқчи, хусусан, Венеция кўрфази экотизимини ўрганувчи илмий ташкилотга 2 миллион евро ажратмоқчи.
Фото: “Правила жизни”
ОАВда Безос ва Санчеснинг тўйига таклифнома суратлари ҳам пайдо бўлган. Ушбу таклифномада айтилишича, эр-хотин меҳмонлардан совғалар ўрнига хайрия ишларига маблағ ажратишни сўраган.
Тўйни ташкиллаштириш билан аввалроқ Жорж ва Амал Клуниларнинг никоҳ маросимини ўтказган Лондоннинг Lanza & Baucina агентлиги шуғулланмоқда. Бошқа байрам тадбирлари доирасида кўпикли байрам дастури ва “Буюк Гецби” услубидаги меҳмондорчилик кечаси ўтказилиши режалаштирилган.
Безоснинг Санчес билан муносабатлари ҳақида 2019 йил бошида маълум бўлган, ўшанда миллиардер 25 йиллик турмушидан сўнг Маккензи Скотт билан ажрашган эди. 2023 йилнинг май ойида тадбиркор Лоренга турмуш қуришни таклиф қилган.
Изоҳ (0)