Жинсий тажовузкорлик жинояти учун қамоқ жазосини ўтаётган америкалик кинопродюсер Ҳарви Вайнштейн Голливуд актёрларининг аслини фош қилувчи хотиралар китобини ёзишга қарор қилди. Бу ҳақда RadarOnline нашри хабар берди.
Манбага кўра, бу китоб аллақачон “Голливуд тарихидаги энг хавфли асар” деб аталмоқда. Продюсернинг мемуарлари Casting Couch: The Real Story (“Кастинг курсиси: Ҳақиқий воқеалар”) деб номланган.
“У кечирим сўраш эмас, қасос олиш ниятида”, дейди манбалардан бири.
Маълум бўлишича, юзлаб саҳифалардан иборат қўлёзмада бир нечта машҳур Голливуд юлдузлари, жумладан, актриса Гвинет Пелтроу ҳақида ҳеч кимга маълум бўлмаган эксклюзив маълумотлар бор.
Аввалроқ Ҳарви Вайнштейн ўзининг туғишган укаси Боб Вайнштейнга нисбатан судга мурожаат қилгани хабар қилинганди. Продюсернинг айтишича, укаси ва Девид Глассер 2016 йилда Тhе Wеinstein Company студиясини молиявий қўллаб-қувватлаш учун ажратилган 45 миллион долларни ўзлаштириб юборган.
Ҳарви Вайнштейн — америкалик продюсер, собиқ киномагнат ва Голливуддаги энг нуфузли шахслардан бири бўлган. У 1952 йилда Нью Йоркда туғилган ва укаси Боб Вайнштейн билан бирга Мiramax Films кинокомпаниясига асос солган. Компания 1990 йилларда кўплаб муваффақиятли фильмларни ишлаб чиқарган.
2005 йилда Ҳарви Тhе Wеinstein Company номли янги студия очди ва яна бир неча йирик лойиҳаларни амалга оширди. Вайнштейн Голливуддаги энг қудратли продюсерлардан бири сифатида танилган, кўплаб режиссёрлар ва актёрлар у билан ишлашга интилди
Аммо 2017 йилда The New York Times ва Тhе New Yorker нашрлари унинг йиллар давомида ўнлаб аёлларга нисбатан жинсий зўравонлик қилгани ҳақида тергов мақолаларини эълон қилди. Кейинчалик ўнлаб аёллар, жумладан машҳур актрисалар Вайнштейнга нисбатан жинсий тажовуз ва босим ҳақида очиқ баёнотлар берди. Шундам сўнг у Нью Йорк суди томонидан жинсий зўравонлик айбловлари асосида 23 йиллик қамоқ жазосига ҳукм қилинди. Ҳозирда Вайнштейн Нью Йоркда, Рикерс оролидаги қамоқда сақланмоқда.
Изоҳ (0)