Ливаннинг шимолидаги Беднаел қишлоғида хўроз боқиш тақиқланди. Бу ҳақда Arab News хабар берди.
Тақиқ кундузи баланд шовқинларнинг олдини олишга ва жамоат тартибини сақлашга қаратилган. Қарор Ал-Қура вилояти Беднаел муниципалитети раҳбари Салоҳиддин Ал-Айюбий томонидан чиқарилган.
“Қишлоқ уйларида хўрозларни сақлаш ноқонуний, чунки улар баланд овозда қичқириб, тартибсизлик ва қўланса ҳид келтириб чиқаради. Нафақат хўрозлар, балки товуқ ва бошқа ҳайвонлар ҳам жамоат тартибини бузади. Кўплаб аҳоли кундуз куни хўрозлар қичқираётганидан шикоят қилган. Шу сабабли мен шундай қарор чиқардим”, деган Ал-Айюбий.
Қарор ижтимоий тармоқларда шов-шувга сабаб бўлган. Интернет фойдаланувчиларининг аксарияти Ал-Айюбийни танқид қилмоқда. Қишлоқ аҳолисига шовқин ёки тартибсизлик келтириб чиқарувчи ҳайвонлардан халос бўлиш учун 10 кун муҳлат берилган.
“Афсуски, кўплаб қишлоқ аҳолиси қарорни нотўғри талқин қилди. Баъзилар товуқлар қандай қилиб хўрозларсиз тухум қўйиши мумкинлиги ҳақида сўраган. Хўрозсиз ҳам товуқлар тухум қўяверади”, деди Ал-Айюбий.
Қўшимча қилинишича, қарорда жамоатчиликни безовта қилаётган бошқа бир қатор омиллар ҳам муҳокама қилинган.
“Мен хўроз боқишга тўсқинлик қилмаяпман. Кимда-ким хўроз боқмоқчи бўлса, бемалол. Фақат уйлар орасида эмас. Шунинг учун хўрозларни уйлардан узоқда ва эркин ҳолатда салқаш мумкин”, деган у.
Уй ҳайвонига эга бўлган ҳар бир киши тозаликни сақлаши, шовқинни чеклаши ва ҳайвонларнинг назоратсиз юришига йўл қўймаслиги каби зарур чораларни кўриш керак.
Қарорга кўра, баланд шовқинли мотоциклларни бошқариш ҳам тақиқланади. Қоидабузарларнинг мотоцикли жарима майдончасига жойлаштирилади, ҳайдовчиси эса жаримага тортилади.
Изоҳ (0)