Италиянинг Белкастро шаҳри мэри Антонио Торкя ғалати қарорни қабул қилди. Унга кўра, маҳаллий аҳолига касал бўлиш — тиббий ёрдам, айниқса, шошилинч ёрдам талаб қиладиган ҳар қандай касалликни юқтирмаслик буюрилди.
Фото: CNN
Шаҳар мэри шу йўл орқали давлат мутасаддиларининг эътиборини тортиш ва Белкастро шаҳридаги тиббиёт билан боғлиқ муаммоларни ҳал қилишни мақсад қилган. Қарор ҳужжатида айтилишича, маҳаллий аҳолига жиддий вирусларни юқтириш ва шошилинч тиббий ёрдамга муҳтож бўлиши мумкин бўлган фаолият билан шуғулланиш тақиқланади.
Мэрнинг сўзларига кўра, провокацияга тўла бундай ташаббус Италиянинг соғлиқни сақлаш идоралари ва Катанзаро префектурасининг эътиборини жалб қилиши керак, бу эса Белкастродаги касалхоналар ва маҳаллий тиббиёт ходимлари сони билан боғлиқ кўплаб масалаларни ҳал қилишга ёрдам беради. Антонио Торкя аввалроқ ҳукумат вакиллари билан боғланишга уринган, бироқ ҳеч қандай жавоб олмаган. Бу сафар у барча эътирозлар кўриб чиқилишига умид қилмоқда:
“Ишонаманки, менинг ташаббусим вазиятни ўзгартиришга қодир бўлган мутасаддилар томонидан ўрганиб чиқилишига туртки бўлади”, дейди мэр.
Белкастро аҳолиси тахминан 1300 кишини ташкил этади, уларнинг ярми нафақахўрлардир. Шаҳарда биргина соғлиқни сақлаш пункти мавжуд. Энг яқин шошилинч тиббий ёрдам пункти эса 45 километр узоқликда жойлашган. Бутун шаҳарда фақат битта тез тиббий ёрдам шифокори ишлайди ва у тунги вақтда, байрам ва дам олиш кунларида аҳолига ёрдам кўрсата олмайди.
Изоҳ (0)