Покистон ва Афғонистон чегарасида разведка хизмати операцияси натижасида ИШИД раҳбарларидан бири қўлга олинди. Бу ҳақда Anadolu хабар берди.
Маълум қилинишича, операция Туркия ва Покистон разведка хизматлари томонидан амалга оширилган.
Қўшма операцияси давомида “тўқ сариқ” тоифаси бўйича қидирувда бўлган ИШИД етакчиларидан бири Ўзғур Алтун қўлга олинди, дейилади хабарда.
Туркия разведкаси таъкидлашича, мазкур операция натижасида ИШИДнинг Туркияга қарши ҳаракат режалари барбод қилинган. ИШИД томонидан олиб борилган жангариларни ёллаш жараёнлари аниқланиб, ташкилотга тегишли рақамли материаллар, шунингдек, ҳаракатлар режаси қўлга киритилган.
Қўлга олинган шахс Абу Ёсир Ал Туркий тахаллуси билан ҳам танилган, келиб чиқиши турк ҳисобланади. У ИШИДнинг медиа ва логистика тармоқлари фаолиятида муҳим рол ўйнаган.
У Туркия ва бутун Европадаги концерт майдонлари ва бошқа фуқаролик объектларига ҳужумлар тайёрлашда айбланмоқда, дейилади хабарда.
Туркия разведкаси Алтуннинг фаолиятини кузатган ва у Европа ҳамда Марказий Осиёдан Афғонистон ва Покистонга ИШИД жангариларининг кўчиб ўтишини мувофиқлаштирган деган хулосага келган.
ИШИД экстремистик гуруҳи жаҳоннинг бир қатор мамлакатлари ва халқаро ташкилотлар томонидан “террорчилик ташкилоти” деб топилган.
Изоҳ (0)