Ижтимоий тармоқларда “метрода тирбандликлар кузатилмоқда” мазмунидаги хабарлар тарқалди. “Тошкент метрополитени” ДУК бунга муносабат билдирди.
Унда қайд этилишича, бугунги кунда ҳар бир йўналишда йўловчилар оқимидан келиб чиққан ҳолатда поездлар ҳаракати жадвал асосида йўлга қўйилмоқда. Шунингдек, доимий равишда эрталабки ва кечки тиғиз вақтларда йўналишларда поездлар сони оширилиб, қўшимча захира поездлар ҳам ҳаракатланмоқда.
Telegram’даги каналларнинг бирида метрополитеннинг “Беруний” бекати тасвирланган ҳолда “Ҳар куни ишдан қайтишда 5 та метро ўтказиб, 6- ёки 7-сига зўрға чиқиб кетишга тўғри келмоқда” мазмунидаги маълумот тақдим этилган. Одам ниҳоятда кўп, метро қатновининг ораси чўзилгани айтилган. Метрополитен бу маълумот бўрттирилган (ёлғон) эканини билдирди.
“Тошкент метрополитени” ДУК масъул ходимлари томонидан охирги 1 ой давомида “Беруний” метро бекатидаги барча камералар тўлиқ ўрганиб чиқилганда бекатда бу каби ҳолат юз бермагани аниқланган.
“Айтиш мумкинки, бундай ҳолат ҳақиқатга тўғри келмайди ва омма олдида ташкилот обрўсига путур етишига олиб келади”, дейилади хабарда.
Метрополитен маъмурияти ижтимоий тармоқ фаолларидан бу каби ёлғон маълумотларни тарқатмасликларини, шунингдек, бунинг учун қонунчиликда белгиланган тартибда жавобгарлик мавжудлигини эслатди.
Метрополитен берган маълумотга кўра, режали профилактик ишлар сабаб 28 июндан бошлаб, “Қурувчилар (12-бекат)—Янгиобод (6-бекат)” бекатлари оралиғида метро поездлар ҳаракати тўхтатилади. Йўловчиларга ноқулайлик туғдирмаслиги учун “Қипчоқ–Янгиобод–Қипчоқ” метро бекатлари оралиғида бепул хизмат кўрсатувчи катта сиғимли автобуслар — метробус ҳаракати йўлга қўйилади.
Изоҳ (0)