Тошкент метрополитенининг “Алишер Навоий” ва “Пахтакор” бекатлари навигация белгилари янгиланди. Лойиҳа TBC Bank ва пайме ташаббуси билан амалга оширилди.
Тошкент шаҳрида ўтказилган янги навигация тизими тақдимотида дизайнерлар, журналистлар ва блогерлар иштирок этди.
Тадбирда навигация одамларнинг метро бекатларида ҳаракатланиши учун қулайлик яратувчи муҳим восита экани айтилди.
Метрополитен йўналишларининг янги белгилари ва кўрсаткчиларини “Бюро Горбунов” арт–директори Илья Бирман бошчилигидаги TBC Bank ва пайме дизайнерлари жамоаси яратди. Илья Бирман транспорт тизимлари ва навигация ечимлари бўйича бутун дунёга машҳур дизайнер ҳисобланади.
“Навигация белгилари одамлар метро кассаси қаерда экани, қайси поезд қаерга юриши ва қанча станция қолганини билишлари учун керак. Кўрсаткичлар бекат архитектурасини бузмаслиги, аксинча уни безаши ва бойитиши муҳим. Биз метро пойтахт аҳолиси ва меҳмонлари учун тушунарли ҳамда қулай бўлиши учун зарур қадамларни қўймоқдамиз. Навигация тизимини такомиллаштириш устида ишлаяпмиз, – деди Илья Бирман тақдимотдаги чиқишида.
Янгиланган навигация тизими қуйидаги белгилар ва кўрсаткичларни ўз ичига олади:
- Метрога кўчадан кириш;
- Бекат номи ва у қайси линияда жойлашгани;
- Ўтиш бекатида керакли платформани топиш;
- Поезд платформанинг қайси томонидан келиши;
- Чиқиш ёки бошқа линияга ўтиш белгилари;
- Шаҳарда керакли жойга чиқиш йўналиши.
Бугунги кунда метродан кунига 500 мингдан 1 миллион нафаргача йўловчи фойдаланади. Барча бекатлар сони 50 та.
“Тошкент метрополитени” ДУК бошлиғининг ўринбосари Элёр Элтаевнинг айтишича, бир неча йилдан бери метро навигациясини янгилаш режаси бўлган.
“Бу лойиҳа Тошкент метрополитенидаги барча йўналишлар белгиларини алмаштиришни кўзда тутади. Ҳозир метро бекатларининг чиқиш ва кириш қисмларини “Яндекс”да кўриниши, автобуслар йўналиши билан боғлаш устида ишланмоқда. “Алишер Навоий” ва “Пахтакор” бекатлари навигацияси пилот лойиҳа ҳисобланади. Унинг камчиликлари аҳоли ва мутахассислар билан муҳокама қилинади. Йил охиригача иккита йўналиш навигациясини якунига етказишни режа қилганмиз”, – метрополитан вакили.
Янги навигация тизимида метрога кириш ва чиқиш нуқталари рақамлар билан белгиланди. Бу йўловчилар учун ҳаракатланишни осонлаштиради. Рақамлар орқали тезда керакли чиқиш йўлини топиш мумкин бўлади.
Рақамлаш бутун ўтиш бекати марказини қамраб олади. Масалан, “Пахтакор” ва “Алишер Навоий” бекатларидаги чиқишлар “1” дан “7”гача бўлган сонлар билан рақамланди.
Навигация тизимида рангларга ҳам алоҳида эътибор қаратилган. Масалан, метро линияси схемаларидан тортиб энг кичик белгиларигача ягона ранг тизими қўлланилмоқда. Бунда биринчи учта линия одатдаги рангларини сақлаб қолди — қизил, кўк ва яшил. Тўртинчи линия эса сариқ рангда кўрсатилади.
“Жамоамиз билан ҳар доим одамлар ҳаётини енгилроқ қилишга интиламиз. Пойтахт метросининг янги навигация дизайни – бизнинг йўловчилар ҳаракатланишини қулайлаштиришга қўшган ҳиссамиздир. Чунки қулай ва тушунарли навигация – шаҳар ҳаётининг муҳим қисми, – деди TBC Bank ва пайме маркетинг бўйича директори Нодира Шерматова.
Тақдимотда айтишилича, янгиланган навигация тизимида метрополитеннинг ҳар бир бекати мазмунига хос расмлар ҳам ўрнатилади. Масалан, “Бодомзор” бекати орқали Тошкент телеминораси яқинидан чиқиш мумкин. Шунинг учун ҳам бекатда телеминоранинг расми акс эттирилади. Бу йўловчиларга манзилни топишда тушунарлироқ ечимдир.
Навигациялар дизайни йўловчилар фикридан келиб чиқиб, янада такомиллаштирилиши режалаштирилган. Сиз ҳам бу борадаги фикрларингизни ушбу ҳаволага кириб, қолдиришингиз мумкин.
Реклама ҳуқуқи асосида
Изоҳ (0)