Қирғизистон ва Ўзбекистон давлат ижтимоий суғуртаси ва пенсия таъминоти бўйича битим лойиҳасини келишиб олди. Бу ҳақда Пенсия жамғармаси матбуот хизмати хабар берди.
Маълум қилинишича, Тошкентда Пенсия жамғармаси раҳбарияти ва Қирғизистон Ижтимоий жамғарма вакиллари ўртасида учрашув ўтказилди. Унда Ўзбекистон ва Қирғизистон пенсия таъминоти тизими, асосий вазифа ва мақсадлари, амалга оширилаётган ислоҳотлар кўриб чиқилди.
Шунингдек, икки мамлакат ўртасида давлат ижтимоий суғуртаси ва пенсия таъминоти тўғрисидаги битим ҳамда уни амалга ошириш бўйича маъмурий келишув лойиҳалари муҳокама қилиниб, вазифалар белгилаб олинди.
Қирғизистон ижтимоий жамғармаси матбуот хизматининг маълум қилишича, битим қуйидагиларни назарда тутади:
- пенсияларни тайинлаш учун суғурта стажини жамлаш;
- пенсияларни етказиб бериш харажатларини ушлаб қолмасдан, яшаш мамлакатидан қатъи назар, фуқароларга тўғридан тўғри тўлаш;
- икки томонлама ажратмалардан қочиш мақсадида хизмат сафарига юбориш ва муддатларни узайтириш бўйича меъёрлар.
Битимнинг асосий мақсади Қирғизистон ва Ўзбекистон фуқароларининг суғурта ва давлат пенсияларини олишда тенг ҳуқуқларини таъминлаш, шунингдек, суғурта бадалларини икки марта тўлашни истисно қилишдан иборат.
Изоҳ (0)