Нигериянинг Сокото штатида дарё бўйида фожиа юз берди. Миллий фавқулодда вазиятлар агентлигининг маълум қилишича, маҳаллий бозорга йўл олган 50 дан ортиқ одамни олиб кетаётган қайиқ 17 август куни Горонё дарёсида ағдарилиб кетди. Бу ҳақда BBC хабар берди.
Расмийларнинг маълум қилишича, ҳозиргача фақат 4 киши тирик ҳолда топилган, қолган 40 дан зиёд йўловчини қидириш ишлари давом этмоқда. Қутқарувчилар маҳаллий аҳоли билан ҳамкорликда қидирувни кучайтирган. Нигерияда бундай бахтсиз ҳодисалар тез-тез содир бўлади. Асосий сабаблар — ортиқча юк ва йўловчи олиш, техник жиҳатдан носоз кемалар ҳамда хавфсизлик қоидаларининг деярли назорат қилинмаслиги.
Нигер дарёсида 2024 йилнинг декабрь ойида 200 дан ортиқ одамни олиб кетаётган қайиқ ағдарилиб, 54 жасад топилганди. 2024 йил ноябрида ҳам шунга ўхшаш ҳодисада деярли 200 киши ҳалок бўлганди. Шунингдек, икки йил аввал, 2023 йилда 300 га яқин одам тўй маросимидан қайтаётиб, қайиқда ҳалокатга учраган ва оқибатда 100 дан ортиқ одам чўкиб кетган эди.
Мутахассисларнинг таъкидлашича, қонун бўйича барча йўловчилар қутқарув жилети кийиши шарт, бироқ қишлоқ жойларда уларнинг етишмаслиги бахтсиз ҳодисаларга сабаб бўлмоқда. Лагос шаҳридаги денгиз хавфсизлиги бўйича мутахассис Чиди Океке BBC’га берган интервьюсида шундай дейди:
“Нигерияда кема ҳалокатларини камайтириш учун қаттиқ текширувларни ва хавфсизлик қоидаларини жорий этиш ҳамда чекловларни қатъий назорат қилиш зарур. Шу билан бирга, маҳаллий аҳолини хавфсизлик ҳақида мунтазам хабардор қилиб бориш керак. Филиппин ва Бангладеш каби мамлакатларда кема капитанлари қатъий рўйхатдан ўтади, ортиқча юк ва йўловчи олиш тақиқланади. Нигерияда ҳам шунга ўхшаш тизим жорий этилиши фожиаларни сезиларли даражада камайтирган бўлар эди”.
Изоҳ (0)