Хитойнинг Хунан вилоятидаги Юеян шаҳрида кабоб саноати институти очилади. Бу ҳақда China Daily нашри хабар бермоқда.
Маълум қилинишича, Юеян очиқ университети ва Юеян шаҳар кабоб уюшмаси шаҳар ҳокимияти ёрдамида мамлакатдаги илк бундай касбий таълим муассасасини яратиш бўйича келишувга эришган.
“Институт ҳозирда кабоб дўконлари иқтисодиёти бўлган тизимни янада тартибли ва яхлит тармоқ занжирига айлантиради”, деди Юеян очиқ университети партия ташкилоти котиби Юе Янхуа.
Таъкидланишича, оловда таом тайёрлаш Юеян умумий овқатланиш иқтисодиётининг муҳим қисмига айланган.
“Бу ерда 2 мингдан ортиқ кабобхона мавжуд бўлиб, уларда 50 минг ходим меҳнат қилади. Ушбу соҳанинг йиллик айланмаси 2 миллиард юандан (280 миллион АҚШ доллари) ошади”, деб ёзади нашр.
Юеян очиқ университети вице-президенти Сзян Сзунфунинг таъкидлашича, кабоб институтининг ташкил этилиши маҳаллий аҳоли, айниқса, ёшларни иш билан таъминлашдаги муаммоларга ечим бўлади. Унинг сўзларига кўра, меҳнат бозорига кириб келаётган кўплаб мактаб битирувчилари муносиб иш топишда қийналмоқда.
“Кабоб соҳасида ишлаш кириш талабларининг пастлиги ва даромаднинг нисбатан юқорилиги туфайли оммалашди”, дея қўшимча қилди у.
Институт зираворлар ишлаб чиқариш, гўштни қайта ишлаш, сабзавотларни тайёрлаш, логистика ва фаолият юритиш каби кабоб саноатининг бутун занжирини ўрганади ва ривожлантиришни режалаштиради.
Келгуси йилдан бошлаб институт ҳар йили уч йиллик касбий тайёргарлик дастурига 50 нафардан 100 нафаргача талабани қабул қилади. Кенг жамоатчилик учун олти ойдан бир йилгача давом этадиган курслар таклиф этилади. Иккита асосий йўналиш ишлаб чиқилмоқда: бири кабоб тайёрлаш бўйича, иккинчиси бизнесни бошқариш бўйича.
Изоҳ (0)