Қозоғистоннинг Олмаота вилоятида EC-145 ҳарбий вертолёти радарлардан йўқолиб қолди. Бу ҳақда Қозоғистон Ҳаво мудофааси кучлари матбуот хизмати хабар берди.
Идоранинг маълум қилишича, ҳаво кемаси Жамбил тумани Таргап қишлоғи ҳудудида ғойиб бўлган.
“Дастлабки маълумотларга кўра, бортда уч нафар экипаж аъзоси бўлган. Мудофаа вазирлиги ва Фавқулодда вазиятлар вазирлиги куч ва воситаларини жалб этган ҳолда қидирув-қутқарув ишлари олиб борилмоқда”, дея таъкидланди Мудофаа вазирлиги хабарида.
Воқеа жойига барча ҳолатларни аниқлаш учун махсус комиссия жўнатилган.
“100 дан ортиқ киши ва 15 га яқин техника воситаси, шу жумладан, авиация ва учувчисиз учиш аппаратлари жалб этилган”, дейилади ФВВ хабарида.
EC-145 вертолётлари ҳақида нималар маълум
EC-145 — Европада ишлаб чиқарилган кўп мақсадли икки двигателли вертолёт бўлиб, ҳам ҳарбий, ҳам фуқаролик мақсадларида қўлланилади.
Улар қуйидаги мақсадларда фаол қўлланилади:
тиббий авиация ва эвакуация;
қидирув-қутқарув операциялари;
ҳудудларни патрул қилиш ва назорат;
шахсий таркиб ва юкларни ташиш;
баланд тоғлар ва ҳароратнинг кескин ўзгариши шароитида вазифаларни бажариш.
Изоҳ (0)