Женнифер Лопес 56 ёшда: католик мактабида ўқиган, адвокатлик фирмасида ишлаган ва Тошкентда концерт берадиган машҳур хонанданинг ҳаёт йўли ҳақида

Кеча, 24 июль куни Женнифер Лопес 56 ёшини нишонлади. Раққосадан қўшиқчигача, актрисадан муваффақиятли тадбиркор аёлгача бўлган йўлни босиб ўтган Жей Ло истеъдод, матонат ва ўзига ишонч ҳар қандай чўққини забт этишга ёрдам беришининг тимсоли ҳисобланади.

Болалик ва ўсмирлик даври

Женнифер Лопес Нью Йоркда яшовчи оддий пуэрторикалик оилада туғилган. Унинг болалиги мегаполиснинг марказий туманларида эмас, балки шаҳарнинг энг хавфли ҳудудларидан бири ҳисобланган нотинч Бронксда ўтган. Бўлажак юлдузнинг қариндошлари шоу-бизнес оламига алоқадор эмасди: отаси дастурлаш билан шуғулланган, онаси эса ўзини уй юмушларига ва фарзандлар тарбиясига бағишлаган. Бироқ бўлажак примадонна 5 ёшидаёқ қўшиқчилик ва рақс санъатини ўрганишни бошлаган.

“Болалигимдан ҳамма нарсани бир вақтнинг ўзида қилишни хоҳлардим: қўшиқ айтиш, рақсга тушиш ва роллар ижро этиш. Мюзикллар оламига шўнғишни яхши кўрардим”.

Женнифер Лопеснинг истеъдоди фақат мусиқа ва рақс билан чекланиб қолмаган. Мактаб йилларида у опа-сингиллари билан католик мактабида таълим олган, академик фанлардан ташқари спорт билан ҳам шуғулланган — югуриш, гимнастика ва софтбол мусобақаларида қатнашган. Жисмоний фаоллик қизга келишган қоматга эга бўлиш ва чидамлилигини ошириш имконини берган. Шунга қарамай, қийинчиликлар пайдо бўлганда Женнифер учун диққатини чалғитишнинг энг яхши усули черков хорида қўшиқ айтиш ва мактаб театрида иштирок этиш бўлган.

Женнифер ўрта маълумотни олгач, юридик коллежга ўқишга киради, аммо бу соҳа унинг қизиқишларига бутунлай ёт эканлигини тушунади. Биринчи семестрни тугатгач, у ўқишни ташлайди. Ота-онаси билан келишолмай, уйдан чиқиб кетади ва Манхеттенда ижарага олинган квартирада яшайди. Ўзини таъминлаш учун Лопес кундузи адвокатлик фирмасида ишлар, кечалари эса раққоса бўлиб ишларди.

Вақт ўтиши билан уни театр вакиллари пайқаб қолишади ва Бродвейдаги мусиқали спектаклларда қатнашишга таклиф қилишади — тез орада Женнифер Европа бўйлаб олти ойлик гастрол сафарига жўнаган Бродвейнинг “Golden Musicals” ансамблига таклиф этилади. Бироқ халқаро гастролларга қарамай, Лопес натижалардан кўнгли тўлмайди, чунки у яккахон ижрочи эмасди.

Жей Ло кинода

Женнифер Лопеснинг кинодаги дастлабки қадамлари унинг ажойиб рақс маҳоратини намойиш этиш имконини берган кичик ролларда намоён бўлди. Ҳақиқий профессионал ютуқ “In Living Color” телешоусида иштирок этиши бўлди. У ерда Лопес икки йил давомида актёрлик маҳоратини такомиллаштирди.

Кинодаги биринчи йирик ролини “Қаердадир” фильмида ижро этди. Ушбу лойиҳа унга мусиқий томошалар билан боғлиқ бўлган аввалги образлардан тубдан фарқ қиладиган драматик қаҳрамонни ижро этиш имконини берди.

Кино карьерасидаги энг муҳим бошланғич нуқта “Менинг оилам” фильмида Мария ролини ижро этиши бўлди. Бу унга биринчи марта кино соҳасидаги мутахассислар эътиборини жалб қилишга ёрдам берди ва энг яхши иккинчи даражали аёл роли учун Independent Spirit мукофотига номзод бўлди.

Лопес бош ролни ижро этган “Селена” фильмининг чиқиши билан эътирофнинг янги босқичи бошланди. У машҳур қўшиқчи Селена образини экранда гавдалантириш имкониятини қўлга киритиш учун кастинглардан ўтишига тўғри келди. Фильм орқали актриса ўзининг актёрлик қобилияти ҳақидаги танқидчилар шубҳаларини ортда қолдириб, истеъдодини намоён қилди. Ушбу роли учун у биринчи марта “Олтин глобус” мукофотига номзод бўлди.

Ҳақиқий ютуқ 1998 йилда Лопес Жорж Клуни билан бирга “Кўриш майдонидан ташқарида” фильмида рол ўйнаганида юз берди. У 1 миллион долларлик гонорар олиб, бундай молиявий натижага эришган биринчи Лотин Америкаси актрисасига айланди.

Мусиқа соҳасидаги шуҳратининг ўсиши туфайли Лопес тез-тез романтик комедияларда бош ролларга таклиф этилди, бу ерда унинг машҳурлиги томошабинлар қизиқишини кафолатларди.

2016 йилда у биринчи марта кўп қисмли лойиҳада ўзини синаб кўрди ва “Кўк туслар” сериалида бош ролни ижро этди. У ерда Федерал тергов бюроси томонидан коррупция бўйича терговга жалб қилинган полициячи образини яратди.

2019 йилда Лопес “Қайтадан бошла” комедиясида романтик образга қайтди, шунингдек, “Раққосалар” драмасида асосий ролни ижро этди. 2022 йилда актриса ўз шахсиятига мослаштирилган “Орзумдаги эркак” фильмида рол ўйнади. 2024 йил май ойида Netflix томошабинларга “Атлас” илмий-фантастик жанговар фильмини тақдим этди, унда бош рол яна Жей Лога насиб этди.

Женифер Лопеснинг карьера йўли турли жанрларни қамраб олган 40 дан ортиқ ролларни ўз ичига олади: енгил романтик комедиялардан тортиб оғир руҳий драма ва кескин триллерларгача.

Мусиқа карьераси

Жей Ло қўшиқчи сифатида 1999 йилда дебют қилган бўлса-да, унинг мусиқа соҳасидаги тез ривожланиши ёш ҳал қилувчи аҳамиятга эга эмаслигини кўрсатди. У санъат мактабига қатнаган Нью Йорк метро линияси рақами шарафига номланган “Оn the 6” альбоми Америка Billboard’ида ўнинчи ўринни эгаллади. “If You Had My Love” сингли бир неча ҳафта давомида жаҳон рейтингларида пешқадамлик қилди.

Икки йилдан сўнг чиқарилган “J. Lo” номли иккинчи альбом Лопесга янада каттароқ муваффақият келтирди. У нуфузли “Грэмми” мукофотига бир неча бор номзод бўлди, ижоди бошқа санъаткорлар билан ҳамкорликда бойиди. Фаолияти давомида у 8 та альбом яратди.

2014 йилда Лопес Бразилияда ўтказилган футбол бўйича жаҳон чемпионатида Питбул ва бразилиялик қўшиқчи Клаудия Лейтте билан биргаликда турнирнинг расмий қўшиғи “Wе Аre One”ни ижро этиб, миллионлаб мухлисларни ҳайратга солди.

2018 йил кузида хонанда испанча “El Anillo” қўшиғи билан мухлисларни хурсанд қилди. Клип биринчи кунда 3 миллиондан ортиқ кўрилди, бир йил ичида эса умумий кўришлар сони чорак миллиардга яқинлашди.

2020 йил Лопес Super Bowl Halftime Show футбол мусобақасидаги чиқиши билан эътиборни тортди. У ерда Шакира билан ҳамкорликда “Jenny from the Block”, “Get Right” ва “Waiting for Tonight” каби ҳит қўшиқларини ижро этди.

2025 йилда Женнифер Лопес “Up All Night: Live in 2025” номли халқаро концерт турини бошлади. Бу тур Европа мамлакатлари, Осиё минтақаси ва Африка қитъасидаги чиқишларни ўз ичига олган эди.

Шу йилнинг 7 август куни жаҳон юлдузи Тошкентдаги “Бунёдкор” стадионида ҳам халқаро концерти доирасида чиқиш қилади. 

Шахсий ҳаёти

Женнифер Лопеснинг шахсий ҳаёти доимо газета сарлавҳаларида ўрин эгаллаб келган. Юлдуз тўрт марта турмуш қурган ва икки фарзандни тарбияламоқда.

Биринчи турмуш ўртоғи кубалик Оҳани Ноа Лопес билан 1997 йилда танишган, аммо улар бир йилдан сўнг ажрашган. Кейинчалик Ноа шахсий хатлар ва уларнинг муносабатларига оид махфий маълумотларни ўз ичига олган кундаликни ошкор қилишга уринган, бироқ суд бу материалларни тарқатишни маън этиб, уни Лопесга катта миқдорда товон пули тўлашга мажбур қилган.

Кейинги танлов раққос Крис Жадд бўлиб, Лопес у билан 2001 йилда турмуш қурган. Уларнинг муносабатлари “Love don’t Cost a Thing” клипи устида биргаликда ишлаш жараёнида бошланган. Бироқ 2002 йилда эр-хотин ажралишларини эълон қилишган, бунга Криснинг оммавий ахборот воситаларининг ҳаддан ташқари эътиборидан норозилиги сабаб бўлган. Лопес Жаддга катта миқдорда товон пули тўлаган.

Лопес учинчи марта 2004 йилда қўшиқчи Марк Энтони билан турмуш қурган. Бу никоҳдан Эмма ва Макс исмли эгизаклар дунёга келган. Бироқ ўн йилдан сўнг уларнинг муносабатлари ёмонлашган ва Лопес никоҳни бекор қилиш ташаббуси билан чиққан, бу эса унинг учун оғир синов бўлган.

“Ҳеч қачон кўзим таги кўкармаган ёки лабим шишмаган, лекин шундай муносабатларим бўлганки, уларда қандайдир зўравонликни ҳис қилганман: ақлий, ҳиссий ёки сўз орқали”.

2017 йилда унинг бейсболчи Алекс Родригес билан муносабатлари бошланди. 2018 йилда улар унаштирилганликларини эълон қилишди. Бироқ 2021 йилда улар ажралишди, аммо дўстона муносабатларни сақлаб қолишди.

Женнифер Лопес деярли 20 йил ўтгач, Бен Аффлек билан яна муносабатларни тиклади. 2022 йил апрель ойида жуфтлик унаштирилди ва июль ойида Лас-Вегасда никоҳ маросимини ўтказди.

2024 йилда оммавий ахборот воситалари уларнинг никоҳидаги келишмовчиликлар ҳақида хабар берди, айниқса Беверли Ҳиллздаги оилавий уйларини сотишга қўйилиши шов-шувга сабаб бўлди. Июнь ойида ОАВ уларнинг иттифоқи бузилаётгани ва Аффлек Лопеснинг туғилган кунига келмаганини ёзди.

2024 йил август ойида юлдуз ажрашиш учун ариза берди, бироқ ўша йилнинг кузида уларни бирга кўришган, бу эса ярашиш эҳтимоли ҳақидаги миш-мишларни келтириб чиқарди. Расман уларнинг ажрашиши 2025 йил январь ойида, томонлар никоҳдан олдин сотиб олинган мулкни тақсимлаш тўғрисида келишувга эришганларидан сўнг якунига етди.