Кўплаб режиссёрлар фильмда қандайдир сир ёки яширин маъно қолдиришни яхши кўради. Баъзи киношинавандалар буни дарҳол пайқашади, баъзи тафсилотларга эса йиллар давомида эътибор беришмайди.
“Гарри Поттер”
Умуман олганда, Хогварц дунёси кейинги воқеалар ривожини тушунишга ёрдам берадиган турли-туман деталларга бой.
Фильмлардаги кўп нарсалар етти рақами билан боғлиқ. Масалан, дастлабки икки фильмда квидиш кийимларида рақамлар йўқ эди, “Азкабан маҳбуси”дан бошлаб эса Гаррининг либосида етти рақами пайдо бўлади. Эсингизда бўлса, Гарри режалаштирилмаган еттинчи тилсим бўлиб чиқади.
“Калмар ўйини”
Биринчи мавсумда хона деворларида ўйинларга ишоралар борлигини кўпчилик пайқамаганди. Иккинчи мавсумда эса деворларнинг дизайни бир оз ўзгариб, осилиб турган одамчалар тасвирланганди. Фақатгина учинчи мавсум бу жумбоқнинг ечимини очди: бўм-бўш залнинг деворларида HODIE MIHI CRAS TIBI деган ёзув бор эди. Лотинчадан таржимаси “Бугун — мен, эртага — сен” деган маънони англатиб, ўйинда иштирок этишнинг хавфли ва ўлимга олиб келиши мумкинлигига ишора қиларди.
“Труман шоуси”
“Труман шоуси” фильмида реалити-шоу ижодкорлари доимо турли маҳсулотларни реклама қилади. Мисол учун, Труманнинг экрандаги хотини нақшли оқ ипак халатда пайдо бўлади ва кейинроқ худди шу халат фильмда телекўрсатув томошабинларидан бирида кўрсатилади. Бу Труманнинг сохта воқелиги қанчалик тижоратга айлантирилганини яна бир бор таъкидлайди.
“Престиж”
Кристофер Ноланнинг фильмлари доимо сир-синоатлар ва маъноли ишораларга тўла. Жумладан, “Престиж” триллерида ҳам ечимни олдиндан илғаб олиш мумкин. Тажрибалардан ҳолдан тойган Роберт Энжер рақиби Альфред Бордендан ғойиб бўлиш сирини сўрайди: улар эгизак ака-укалиги маълум бўлади. Ҳаммаси шунчалик оддийки, буни олдиндан пайқаса бўларди. Шунчаки қушчанинг ғойиб бўлиш фокусини кузатаётган ва кейинчалик Альфред дан “Унинг акаси қаерда?” деб сўраган кичкина болани эсланг.
“Титаник”
Фильм бошида Роузнинг соч турмаги ва кийимлари анча расмий ва қатъий кўринишга эга. Қаҳрамон биринчи марта кўринган либоси эса оқ-қора йўл-йўл бўлгани туфайли маҳбуслар кийимини эслатади. Кейинчалик у Жекни севиб қолганда, сочлари ва кўйлаклари эркин кўриниш ола бошлайди.
Роузнинг фильм бошида асосий зинапояда соат олдида Жек билан учрашиш учун кийган кўйлаги якуний саҳнада яна пайдо бўлади. Кўйлак айнан ўша-ўша, фақат ранги оқ. Шундан тахмин қилиш мумкинки, вафотидан сўнг Роуз жаннатга тушиб, у ерда севгилиси билан қайта учрашади ва шу билан соат олдида учрашиш ваъдасини бажаради.
“Дедпул ва Росомаха”
“Дедпул ва Росомаха” блокбастерида Жон Хюзнинг машҳур “Самолёт, поезд, машина” комедиясидаги ёниб кетган автомобиль кадрда пайдо бўлади. Бу бежиз эмас: Дедпул ролини ижро этган актёр Райан Рейнолдс бу фильмнинг, айниқса Жон Кенди персонажининг ашаддий мухлиси. Шу сабабли Дедпул ва Росомаханинг дўстлиги Жон Кенди ва Стив Мартин қаҳрамонлари ўртасидаги муносабатга ўхшаб ривожланади: жиддий ва жаҳлдор Росомаха эзма Дедпулни зўрға қабул қилади.
Райан Рейнолдс асли канадалик эканини ҳисобга олсак, унинг ҳазил-мутойиба услуби яна бир канадалик актёр Жон Кенди таъсирида шаклланганига ажабланмаса ҳам бўлади. Жон Кендига ҳурмат бажо келтириш мақсадида Райан Рейнолдс ҳатто у ҳақида ҳужжатли фильм суратга олишни режалаштирмоқда.
“Тўлин ой қироллиги”
Уэс Андерсон фильмларидаги ҳар бир майда-чуйда тафсилотни назорат қилиши ва энг синчков мухлислари учун яширин маъноларни қолдиришни ёқтириши билан танилган. “Тўлин ой салтанати” фильмида бош қаҳрамонни тез-тез илмий-фантастик романларни ўқиётганини кўриш мумкин. Бу китобларнинг бирортаси ҳам ҳақиқий эмас, бироқ улардан бирининг орқа муқовасида Фрэнк Гербертнинг “Дюна” асаридаги харита тасвирланган.
Изоҳ (0)