Бразилиялик MMA жангчиси, UFC’нинг ўрта вазн (84 кг) тоифасида 6-ўринни эгаллаб турган Кайо Борральо UFC 319 турнирида октагонга чиқадиган Ҳамзат Чимаев фаолиятини якунлаши мумкинлиги ҳақида фикр билдирди.
Унга кўра, чечен жангчиси навбатдаги жангдан кейин аралаш яккакурашлардаги фаолиятини якунлаши мумкин:
Баъзилар айтишича, агар у камарни қўлга киритса, фаолиятини якунлайди. Шунга ўхшаш гапларни эшитдим. Бу — ҳозирча фақат миш-миш. Аммо бу эҳтимолдан ҳоли эмас. Чунки у катта босим остида. Саломатлиги билан боғлиқ муаммолари бор. Билишимча, унга мамлакати томонидан кучли босим бўлмоқда. Шунингдек, моддий томонлама ҳолати ҳам яхши. Шундай экан, нега кетмасин? — деди Борральо MMA Hoje нашрига берган интервьюсида.
Маълумот учун, UFC 319 турнири 16 август куни бўлиб ўтади. Ҳамзат Чимаев ушбу турнирда амалдаги чемпион, жанубий африкалик Дрикус дю Плесисга қарши октагонга кўтарилади.
Изоҳ (0)