Сўнгги йилларда машҳурлар бирор маҳсулот рекламасида иштирок этиш билан чекланмай, тўлақонли брендлар яратишга киришди. Улар нафақат маҳсулот юзига айланди, балки тадбиркорлик соҳасида фаол меҳнат қилди ва ўз аудиториясини шакллантирди. Сўнг ўз компанияларини ривожлантириб, катта фойда эвазига сотиб юборди. Қуйида ана шундай муваффақиятга эришган таниқли инсонлар ҳақида сўз юритамиз.
Ҳейли Бибер ва Rhode Skin
Модель ва тадбиркор Ҳейли Бибер 2022 йилда Rhode Skin брендини ишга туширди. У минимализм ва “шишадек ялтироқ” тери эффектига асосланган маҳсулотлар сериясини тақдим этди. Бибернинг компанияси қисқа фурсатда катта муваффақиятга эришди.
2025 йилнинг май ойида e.l.f. Beauty компанияси Rhode’ни 1 миллиард долларга баҳоланган битим орқали сотиб олди: унинг 600 миллиони нақд пулда, 200 миллиони акциялар кўринишида, қолган 200 миллиони эса кейинги уч йилдаги натижаларга боғлиқ бонус сифатида белгиланди.
Битимдан сўнг ҳам Бибер бренд раҳбари сифатида қолди. Ҳозирда у креатив директор ва инновациялар бўйича менежер лавозимида фаолият юритмоқда. Rhode яқин вақт ичида Sephora дўконларида ҳам сотувга чиқиши мўлжалланган.
Жорж Клуни ва Casamigos Tequila
Жорж Клуни 2013 йилда Ранде Гербер ва Майк Мелдман билан биргаликда Casamigos Tequila брендига асос солди. Дастлаб бу ичимлик шунчаки актёр дўстлари даврасида улашиш учун яратилган эди. Бироқ сифатга бўлган эътибор ва Клунининг машҳурлиги брендни тез орада оммалаштирди.
2017 йилда дунёдаги йирик алкоголь компанияларидан бири бўлган Diageo компанияси Casamigos’ни 1 миллиард долларга сотиб олди: 700 миллиони дарҳол, 300 миллиони эса кейинги кўрсаткичларга қараб бонус тарзида тўланди. Бу битим алкоголь бозоридаги энг йирик келишувлардан бири сифатида тарихга кирди.
Жессика Альба ва The Honest Company
Машҳур актриса Жессика Альба 2011 йилда The Honest Company брендига асос солди. Унинг мақсади болалар ва уй учун экологик тоза ва токсинларсиз хўжалик маҳсулотлари ишлаб чиқариш эди. Ушбу ғоя Альбанинг ўз оиласининг хавфсизлигига бўлган эътиборидан келиб чиққан.
2021 йилда компания биржада рўйхатга олиниб, 1,4 миллиард долларга баҳоланди. Альбага тегишли улуш эса тахминан 120 миллион доллар деб топилди. 2024 йилда актриса креатив директорлик лавозимини тарк этди, бироқ директорлар кенгашида қолишда давом этди.
Бугунги кунда The Honest Company маҳсулот турларини кенгайтириб, экологик тоза маҳсулот ишлаб чиқариш, очиқлик ва истеъмолчи ишончи асосида бозордаги мавқеини мустаҳкамлаб бормоқда.
Dr. Dre ва Beats by Dre
2006 йилда ҳип-ҳоп афсонаси Dr. Dre ва продюсер Жимми Аёвин биргаликда Beats by Dre брендини яратди. Мақсад — Apple’нинг оқ наушникларига рақобатчи бўладиган, бас овозли ва замонавий дизайндаги қулоқчинларни ишлаб чиқиш эди. Натижада Beats қисқа фурсатда дизайни, йирик маркетинг кампаниялари ва машҳурлар иштирокидаги рекламалари туфайли машҳурликка эришди.
2014 йилда Apple компанияси Beats’ни 3 миллиард долларга сотиб олди. Бу Apple тарихидаги энг йирик харид бўлди.
Кайли Женнер ва Kylie Cosmetics
Модель ва тадбиркор Кайли Женнер 2015 йилда Kylie Cosmetics брендини ишга туширди. У косметикага бўлган қизиқишини бизнесга айлантириб, илк маҳсулоти — Kylie Lip Kit’ни тақдим этди. Ижтимоий тармоқлардаги улкан аудиторияси орқали бренд тез орада гўзаллик саноатидаги етакчилардан бирига айланди.
2019 йилда Coty Inc. компанияси бренднинг 51 фоиз улушини 600 миллион долларга харид қилди ва бутун брендни 1,2 миллиард долларга баҳолади. Кайли қолган 49 фоиз улушни сақлаб қолган ҳолда, маҳсулот ишлаб чиқиш ва маркетингда иштирок этишда давом этди.
Райан Рейнолдс ва Mint Mobile
Актёр Райан Рейнолдс 2019 йилда арзон мобил алоқа оператори Mint Mobile брендининг акцияларини харид қилди. У ўзининг ҳазилкаш услуби ва ижодий маркетинги орқали брендни тез орада катта аудиторияга танита олди.
2023 йилда Т-Mobile Mint Mobile компанияси Kaʼena Corporation’ни 1,35 миллиард долларга харид қилгани эълон қилинди. ОАВ хабарларига кўра, Рейнолдс 25 фоизлик улушдан 300 миллион доллар даромад кўрган. У бренднинг маркетинг стратегиясида ҳозир ҳам фаол иштирок этмоқда.
Ким Кардашьян ва KKW Beauty
Ким Кардашьян 2017 йилда KKW Beauty брендига асос солди. Унинг машҳурлиги ва ижтимоий тармоқлардаги таъсири брендга қисқа фурсатда муваффақият олиб келди. Айниқса контур қаламлар тўплами тезда оммалашди.
2020 йилда Coty Inc. компанияси бренднинг 20 фоиз улушини 200 миллион долларга харид қилди. Компаниянинг умумий қиймати 1 миллиард доллар деб баҳоланди.
2022 йилга келиб Кардашьян ребрендинг қилиб, маҳсулотларини тери парваришига ихтисослашган SKKN by Kim брендига айлантирди. 2025 йил март ойида эса унинг SKIMS компанияси SKKN’нинг 100 фоиз улушини сотиб олиб, Coty’ни лойиҳадан тўлиқ чиқариб юборди.
Изоҳ (0)