Лондонда янги рекорд ўрнатилди — у ерда Supermenнинг энг баланд оммавий ҳайкали яратилди. У баландлиги 300 метрдан ошадиган “Шард” осмонўпар биносининг чўққисига ўрнатилган.
Комикс қаҳрамони шаклидаги санъат асари 3,35 метр (11 фут) баландликда бўлиб, оғирлиги 120 килограммдан ортиқ. Supermen’нинг танаси экотоладан ясалган, ҳайкалчанинг ўзи эса фотополимер қатронидан қуйилган. Улкан киноқаҳрамон “Шард” осмонўпар биносининг энг баланд нуқталарига рухланган пўлат арқонлар ёрдамида маҳкамланган. Кино қаҳрамони оёғини букиб, бошини пастга эгиб, гўё шаҳарни кузатаётгандек тасвирланган.
Supermen ҳайкалчасини яратиш тўрт ой давом этди, ишда 20 дан ортиқ киши қатнашди. Улар санъат асарини мукаммал даражага етказиш учун жами 2 000 соат меҳнат қилган.
Унинг устида ишлашга ҳозирда Supermen ролини ижро этаётган Девид Коренсвет жалб қилинган. Суратга олиш жараёнида актёрнинг қомати 3D форматда сканерланди, кийим ва плашни яратиш учун кўплаб манбалар ва материаллардан фойдаланилди.
“Supermen” фильмининг сценарий муаллифи ва режиссёри, шунингдек, DC Studios ҳамраиси Жеймс Ганн The Sun билан суҳбатда ўрнатилган ҳайкалдан ҳайратга тушганини таъкидлади.
“The Shard чўққисида бизнинг Supermen’имизнинг шунчалик ҳақиқий тасвирини кўриш жуда ажойиб”, дея таассуротлари билан ўртоқлашди Ганн.
Маълумки, яхши об-ҳаво шароитида ҳайкални 64 километр (40 мил) радиусда кўриш мумкин. Шунингдек, инсталляция 11 июль куни Британияда бўлиб ўтадиган Supermen ҳақидаги янги фильм премерасига бағишланганини таъкидлаш жоиз.
The Shard вакиллари “бу афсонавий образни шунчалик жасур ва ҳаяжонли тарзда жонлантиришга ҳисса қўшганларидан ғоят фахр туйишларини” билдирди.
Ёшлар орасида яна бир суперқаҳрамон тобора машҳур бўлиб бормоқда. Илгари мутахассислар ўсмирларнинг Ўргимчак одам кийимини кийиб, атрофдагиларни ўз хатти-ҳаракатлари билан безовта қилиш ва ижтимоий тармоқлар учун видеолар суратга олишни ёқтиришини айтган эди.
Изоҳ (0)