Ғазода 3 июль тонгидан бери 73 нафар фаластинлик Исроил ҳарбийлари томонидан ўлдирилди. Бу ҳақда Al Jazeera хабар берди.
Ҳалок бўлганлар орасида Ғазо гуманитар жамғармасига (ҒГЖ) ёрдам олиш учун келган 33 нафар одам бор. Гувоҳлар одамлар “асоссиз отиб ташланган”ини билдирган. Сўнгги 48 соат ичида Исроил кучлари томонидан 300 дан ортиқ фаластинлик ўлдирилган. Ғазо ҳукумати матбуот хизмати маълумотларига кўра, Исроил шу давр ичида секторда “26 та қонли қирғин содир этган”.
Шу билан бирга, ҲАМАС Ғазода вақтинчалик ўт очишни тўхтатиш бўйича янги таклифларни ўрганаётганини билдирган. АҚШ президенти Дональд Трамп Исроил 60 кунлик сулҳ таклифига рози бўлгани маълум қилган эди.
Исроилнинг Ғазога қарши уруши оқибатида камида 57 012 киши ҳалок бўлиб, 134 592 киши яраланган. 7 октябрдаги терактлар чоғида Исроилда тахминан 1 139 киши ҳалок бўлиб, 200 дан ортиқ киши асирга олинган.
Гувоҳлар отишмаларни тасвирлаб берди
Одамлар озиқ-овқат олиш мақсадида соатлаб навбатда турган. Бирданига ҳеч қандай сабабсиз отишма бошланиб кетган. Al Jazeera мухбири 3 июль куни эрталаб бир қатор омон қолганлар билан суҳбатлашган. Уларнинг айтишича, олдиндан огоҳлантирмасдан ўқ узилган. Одамлар ўзларини панага олган. Отишма шиддати туфайли фавқулодда хизматлар ва тиббий гуруҳлар ҳудудга кира олмаган.
Associated Press агентлиги ўтказган суриштирувда ҒГЖ тарқатиш марказларини қўриқлаётган АҚШ пудратчилари хавф бўлмаса ҳам фаластинликларга қарши ўқ, граната ва қалампирли пуркагичлардан фойдаланаётгани аниқланган.
Ўтган ҳафта Исроилнинг “Haaretz” газетаси томонидан ўтказилган текширувда исроиллик аскарларнинг кўрсатмалари тўпланган. Унга кўра, армияга Ғазода гуманитар ёрдамни кутиб, қуролсиз одамларга атайлаб ўқ узишни буюрилгани маълум қилинган.
Изоҳ (0)