Еврокубокларда ҳафтанинг энг яхшилари аниқланди

Еврокубоклар плей-офф босқичидан ўрин олган жорий ҳафтадаги ўйинлар якунланди. УЕФА ҳар бир мусобақада ҳафтанинг энг яхшилари номини маълум қилди.

“Реал” ҳужумчиси Винисиус Жуниор Чемпионлар Лигасида ҳафтанинг энг яхши ўйинчиси деб топилди. Бразилиялик футболчи “Ливерпуль”га қарши кечган ўйинда (5:2) дубль қайд этди ва битта голли узатма амалга оширди.

Ушбу соврин учун шунингдек, Риёд Маҳрез (“Манчестер Сити”), Ҳоқон Чалхонўғлу (“Интер”) ва Ирвинг Лосано (“Наполи”) кураш олиб борганди.

Чемпионлар Лигасида ҳафтанинг энг чиройли голи номига “Наполи” футболчиси Жованни Ди Лоренцонинг “Айнтрахт” дарвозасига киритган тўпи лойиқ кўрилди.

“Ювентус” ярим ҳимоячиси Анхел ди Мария эса Европа Лигасида ҳафтанинг энг яхшиси бўлди. Ди Мария “Нант”га қарши баҳсда (3:0) ҳет-трик қайд этганди. Шунингдек, аргентиналик футболчининг голи ҳафтанинг энг чиройли голи деб топилди.

Di María's stunning opener wins Goal of the Week! 💥⚽️@Heineken || #UELGOTW || #UEL pic.twitter.com/kCsly4ZAiN

— UEFA Europa League (@EuropaLeague) February 24, 2023

Конфедерациялар Лигасида эса “Андерлехт” вакили Барт Вербрюгген ҳафтанинг энг яхши ўйинчи деб топилди. Футболчи “Лудогорец” билан ўйинда (2:1) дубль орқали жамоасига ғалаба келтирганди.