Eurobike 2025 кўргазмасида Kamingo компанияси оддий велосипедни тезда электр велосипедга айлантириш имконини берувчи митти моторни тақдим этди. Биринчи марта моторни велосипедга ўрнатиш тахминан уч дақиқа давом этади, шундан сўнг қурилмани том маънода сония ичида олиб ташлаш ва қайта ўрнатиш мумкин.
Kamingo атиги 2,27 кг вазнга эга бўлиб, учта компонентдан иборат: мотор, батарея ва контроллер. Доимий магнитли синхрон двигатель 750 Вт энг юқори қувватни беради. 266 Вт/соат сиғимли аккумулятор сув идиши шаклида ишлаб чиқарилган ва 90 км гача масофани босиб ўтишни таъминлайди.
Тизим учта иш режимини — моторни ўчириш, педалларни бурашда ёрдам бериш ва тўлиқ электрда юришни қўллаб-қувватлайди. Кичик рангли дисплейли контроллер рулга маҳкамланади ва режимларни алмаштириш имконини беради. Қўшимча хавфсизлик учун қурилма йиқилиш ва сиқилиш сенсорлари билан жиҳозланган. Бундан ташқари, унда рекуператив тормозлаш функцияси мавжуд — у тормоздан фойдаланганда ажралиб чиқадиган энергия ҳисобига аккумуляторни зарядлаш имконини беради.
Ушбу янги маҳсулотни олдиндан буюртма қилиш нархи 349 доллардан бошланади. Дастлабки етказиб бериш эса 2025 йил декабрь ойига режалаштирилган.
Изоҳ (0)