“Ўзбекистон – истеъдодлар замини” ёшлар ҳаракати шаҳарчасида 4 июнь куни Uzbekistan: Land of Talents глобал промоушн кампаниясининг расмий очилиш маросими бўлиб ўтди.
Катта саъй-ҳаракатларни креатив ва медиа лойиҳалар орқали бирлаштириш
Uzbekistan: Land of Talents глобал кампанияси Ўзбекистон учун янги, ҳозирги замон ва глобал жараёнларга мос брендни шакллантиришни мақсад қилган. Ушбу кампания Ўзбекистонни инсон капитали орқали ривожлантириш сиёсатига уйғун ҳолда, бу йўналишда қилинаётган ишларнинг мантиқий давоми сифатида амалга оширилади.
Креатив ёндашувлар, медиа ва контентга урғу берувчи кампания барча манфаатдор томонларини бирлаштиришни кўзда тутади, шунингдек, йирик хусусий бизнесларнинг ESG (корпоратив ижтимоий масъулият) стратегияларини амалга татбиқ этиш учун ноёб имконият яратади.
Кампания Тошкент шаҳар ҳокимлиги ташаббуси билан ҳукумат кўмагида амалга оширилаётган ёшлар ҳаракати билан бошлаб берилмоқда. Uzbekistan: Land of Talents кампаниясини Kapitalbank, Uzum ҳамда Ucell каби хусусий сектор гигантлари қўллаб-қувватламоқда. Катта кўламдаги лойиҳага стратегик ҳамкор сифатида бошқа йирик компаниялар ва стейкхолдерлар фаол жалб қилиши режалаштирилган. Шунинг учун, 4 июнь кунги очилиш маросимига ҳам Ўзбекистонда турли соҳаларда фаолият юритаётган ишбилармонлар ва хусусий секторнинг муҳим ўйинчилари вакиллари таклиф этилди.
Медиа, креатив саноат, лойиҳалар менежменти ҳамда Ўзбекистон ва хорижда прогрессив ўзбекистонликлар билан ишлаш бўйича тўплаган кўп йиллик тажрибага эга жамоа лойиҳа ижрочиси бўлади. Тадбир давомида 2023 йилдан бошлаб “Истеъдодлар жамиятини қуриб” деган шиор билан нашрдан чиқаётган Uzbekistan’s Club журналининг навбатдаги сони тақдимоти ҳам бўлиб ўтди. Муқовасида “Манчестер Сити” ҳимоячиси Абдуқодир Ҳусанов тасвирланган журнал доимгидек энг прогрессив ўзбекистонликларнинг ҳикоялари, фикр-мулоҳазаларини креатив ёндашув билан ўзида жамлаган.
Жаҳон тажрибаси
Маросимда таъкидланганидек, дунёда турли мамлакатлар ўзи учун таянч йўналишларни белгилаб, уларни ўзининг мамлакат брендига, глобал позициясига уйғунлаштиради.
Мисол учун:
- Ҳиндистон — Incredible India (Ақлбовар қилмас Ҳиндистон) Туризм ва ахборот технологиялари мамлакати.
- Руанда — Remarkable Rwanda (Лол қолдирувчи Руанда) Тозалик, IT ва бошқарувда африканча намуна.
- Эстония — e-Estonia Ракамли давлат, технология маркази.
- Вьетнам — Make in Vietnam (Вьетнамда ишлаб чиқаринг) Экспорт маҳсулотлари ишлаб чиқаришни ауцорс қилиш учун янги манзил.
- Грузия — Europe Starts Here (Европа шу ердан бошланади) Осон бизнес, шаффоф бошқарув.
Ўзбекистон учун мос, янги бренд
Кампания ғоясига кўра, Ўзбекистон учун эса ана шундай мақом бу – “Истеъдодлар етишиб чиқадиган мамлакат” деган бренд бўла олади. Айнан инсон капитали – истеъдодли, салоҳиятли, меҳнаткаш ва интилувчан одамлар – Ўзбекистоннинг активи. Дунёда кўплаб мамлакатлар демографик инқироз ва аҳоли сони ўсмаслиги билан боғлиқ муаммоларга дуч келмоқда. Ўзбекистон эса аҳоли сони ўсиши ва таълим соҳасининг ривожланиши туфайли ноёб демографик дивидендга эга бўлиб қолмоқда. Шундай пайтда фойдали қазилмалар ёки бошқа тармоқлар эмас, айнан аҳолининг интеллектуал фаолиятига асосланган соҳалар (IT, бизнес, креатив саноат, молия ва хизматлар сектори (тертиарй сеcтор) кабилар) иқтисодиётнинг драйверига айланиши зарур.
Дунё бўйлаб ўзбекистонликлар оддий ишчилар бўлиб эмас, малакали мутахассислар сифатида етишиб чиқиши ҳам кампаниянинг олий мақсадларидан биридир. Оғир шароитларда меҳнат қиладиган ҳамюртларимиз Ўзбекистонга юбораётган пуллар фарзандлар келажаги, уларнинг таълимига тикилиши учун ҳам муваффақиятли бўлиш, илм олиш, дунё миқёсига чиқиш кабилар миллат орзу-ҳавасига, миллионлаб инсонларнинг идеалига айланиши жуда муҳим.
Изоҳ (0)