Ижтимоий тармоқларда Magic City боғида намойиш этилган театрлаштирилган томошада ўз жонига қасд қилиш саҳнаси кўрсатилганлиги ҳақида хабарлар тарқалди. Болалар омбудсмани ҳолат юзасидан изоҳ берди.
Қайд этилишича, “Болаларни уларнинг соғлиғига зарар етказувчи ахборотдан ҳимоя қилиш тўғрисида”ги қонуни 16 ва 19-моддаларига ҳамда ҳукумат қарори билан тасдиқланган “Оммавий тадбирларни ўтказиш қоидалари”нинг 59-бандига мувофиқ ҳолатга Magic City дирексияси томонидан расмий муносабат ёки тушунтириш берилиши сўралди.
Шунингдек, мазкур ҳолатда қонун бузилиши ёки ҳуқуқбузарлик мавжуд ёки мавжуд эмаслигини ўрганиш, аниқланган вазиятга қонуний чора кўришни сўраб, прокуратура органларига мурожаат қилинган.
Болалар омбудсмани ҳолат юзасидан ўз кузатувини давом эттиришини қўшимча қилган.
Маълумот учун, “Болаларни уларнинг соғлиғига зарар етказувчи ахборотдан ҳимоя қилиш тўғрисида”ги қонуни 16-моддасида “болаларни уларнинг ҳаётига ва (ёки) соғлиғига хавф соладиган хатти-ҳаракатларни содир этишга, шу жумладан ўз соғлиғига зарар етказишга, ўз жонига қасд қилишга ва шундай ҳаракатларни тарғиб қилишга ундайдиган” ахборот маҳсулоти болалар ўртасида тарқатилиши тақиқланган ахборот ҳисобланиши белгиланган.
Қонуннинг 19-моддасига кўра, болаларнинг соғлиғига зарар етказувчи ахборотдан болаларни ҳимоя қилишни таъминлашнинг маъмурий ва ташкилий чора-тадбирларини, дастурий-аппарат ва техника воситаларини қўлламай туриб, ушбу ахборотнинг жамоат жойларида айланишига йўл қўйилмайди.
Болаларнинг ўз ёш тоифасига мос келмайдиган ахборот маҳсулоти намойиш этиладиган томошабоп тадбирларни ташкил этишда ва ўтказишда иштирок этишига йўл қўйилмайди.
Бундан ташқари, ҳукумат қарори билан тасдиқланган Оммавий тадбирларни ўтказиш қоидаларининг 59-бандига мувофиқ оммавий тадбирни ўтказиш вақтида тадбир иштирокчиларига жамоат хавфсизлиги, одамларнинг ҳаёти ва соғлиғига хавф туғдирувчи, оммавий тадбирни ташкил қилиш ва ўтказишнинг белгиланган тартибини бузувчи ёки бундай хатти ҳаракатларни содир қилишга ундовчи ҳаракатларни бажариш тақиқланади.
Изоҳ (0)