Бой одамларнинг асосий сири — улар ҳам бошқалар каби тежашга ҳаракат қилишади. Ҳар қандай бюджетни тўғри режалаштириш молиявий назорат қилишга ёрдам беради ва “ой охиригача қандай етказиш” ҳақида бош оғриғини камайтиради. Мутахассислар эса қаердан тежаш мумкинлигини аниқлаб, ортиқча харажатлардан қочиш йўлларини айтди.
Спорт залига абонемент
Спорт залига абонемент сотиб олганларнинг фақат оз қисми у ерга мунтазам боради. Агар сизда ҳали мунтазам шуғулланиш одати шаклланмаган бўлса, бундай обуна пулни беҳуда сарфлаш бўлиши мумкин. Бунинг ўрнига уйда бажариладиган машғулот дастурларини кўриб чиқинг ёки ёга, рақс, зумба ва шу каби бошқа гуруҳли машғулотларга ёзилинг. Бу орқали оилавий бюджетга зарар етмайди, соғлиғингиз эса яхшиланади.
Янги кийим сотиб олиш
Янги кийим олишдан олдин бу сизга ҳақиқатан керакми ёки йўқ, ўйлаб кўринг. Агар замонавий кийим излаётган бўлсангиз, иккинчи қўл дўконларига эътибор қаратинг. Ҳозирда бу каби дўконлар ўрнини босадиган кўплаб сайтлар ҳам бор. Винтаж кийимлар — бу 25 йилдан ортиқ “ёши”га эга кийимлар бўлиб, улар ноодатий кўринишга эга бўлишни истаганлар учун жуда мос келади. Интернетда винтаж кийимларни арзон нархда топиш мумкин.
Болалар учун товарлар ва ўйинчоқлар
Ота-оналарга доим ниманидир сотишга ҳаракат қилишади, лекин бу нарсаларнинг 90 фоизи аслида керак эмас. Масалан, салфетка илитгич, “махсус” тагликлар, болани бир зумда тинчлантирадиган беланчак ва ҳоказо. Ишлаб чиқарувчилар уйда янги туғилган чақалоқ билан бўлишни тинчлик ва уйғунликка тўла деб кўрсатмоқчи бўлишади. Бироқ тажрибали ота-оналар бу нарсаларнинг кўпи шунчаки пул сарфлаш учун сабаб эканини яхши билишади.
Янги қурилма ёки “мўжизавий” таглик сотиб олишдан олдин интернетда изланинг. Ота-оналар ўз тажрибалари билан бўлишади, бу эса бошқаларга ортиқча харажатлардан қочишда ёрдам беради. Худди шунингдек, ўйинчоқларнинг ҳам аксарияти деярли “бир марталик”, чунки бола улардан тез зерикади.
TV канал пакетлари
150 та интернет-канал учун пул тўлаб, уларнинг фақат 2–3 тасини томоша қилаётган бўлсангиз — бу беҳуда харажат. Ҳозир кўпчилик стриминг хизматларидан фойдаланмоқда. Бу хизматлар сиз ёқтирган сериаллар ва шоуларни ҳам ишлаб чиқаради. Уларнинг обунаси эса кўп ҳолларда кабел телевидениеси пакетларидан анча арзон тушади.
Уйдан ташқарида овқатланиш
Ишдаги бизнес-ланчлар, автоматдан олинган қаҳва, уйга қайтаётганда йўлда ейилган ҳотдог — буларнинг барчаси молиявий жиҳатдан сезилмайди, лекин охир-оқибат жиддий харажатга айланади. Уйда овқат тайёрлаш эса арзонроқ ва соғломроқ. Озроқ қунт қилинса, бу кўп вақт олмайди. Интернетда контейнерда олиб юришга қулай, оқиб кетмайдиган кўплаб енгил ва тўйимли таомлар рецептлари бор.
Ейилмайдиган маҳсулотлар
Кўпинча маошгача етказиш қийин бўлса-да, барибир баъзи озиқ-овқатларни ташлаб юборамиз. Аслида эса у билан бирга пулимизни ҳам ахлатга ташлаймиз. Бунинг олдини олиш учун бир неча оддий қоидага амал қилиш кифоя:
- фақат узоқ муддат сақланадиган маҳсулотларни кўп миқдорда олинг;
- ҳафталик меню тузинг ва фақат керакли нарсаларни харид қилинг;
- яроқлилик муддатини текшириб боринг;
- дўконга боришдан олдин тўқ ҳолда боринг — оч харидор энг кўп харажат қиладиган харидордир.
Изоҳ (0)