Ҳаводан бензин олиш: янги ихтиро инсониятни ёқилғи инқирозидан қутқариши мумкин

Сўнгги йилларда бутун дунё бўйлаб электромобиллар савдоси катта суръатларда ошиб бораётган бўлса-да, 90 фоиздан ортиқ автомобиллар бензин ёки дизель ёқилғилари ёрдамида ишламоқда. Атроф-муҳитга етказадиган зарарига қарамай, уларнинг тўлиқ ўрнини босадиган ёқилғи бўйича муқобил ечимлар ҳали мавжуд эмас. Аммо Aircela компаниясининг янги ихтироси бу борада тарихий инқилоб ясаши мумкин.

Мазкур технологиянинг асосий ғояси ёқилғини тўғридан тўғри ҳаводан ишлаб чиқишда. Компания вакилларининг маълумотига кўра, қурилма синовдан муваффақиятли ўтган ва бир суткада нефть ишлатмасдан ҳамда атмосферага зарарли газлар чиқармасдан 4 литрга яқин бензин ишлаб чиқарилган.

Ўлчами оддий музлаткичга яқин бўлган ушбу қурилма ҳаво таркибидаги карбонат ангидрид (CО₂) ни калий гидроксид (KOH) асосидаги махсус филтр орқали ушлаб қолади, кейин қуёш энергияси билан ишловчи электролиз тизими сув молекулаларини водород (H₂) ва кислородга (О₂) ажратади. Сўнг карбонат ангидрид ва водород катализатор иштирокида аввал метанолга, кейин эса тўлиқ функционал бензинга айлантирилади. Олинган ёқилғи кимёвий таркиби жиҳатидан оддий АЁҚШларда сотиладиган бензиндан фарқ қилмайди.

Шунингдек, ихтиро автомобиль эгаларига исталган жойда мустақил равишда ёқилғи ишлаб чиқариш имконини беради, бу, айниқса, ёқилғи қуйиш шохобчаларига кириш имконияти чекланган чекка ҳудудлар аҳолиси учун долзарбдир. Муҳими, қурилмадан фойдаланиш учун ёқилғи таъминот тизимини ёки автомобиль конструкциясини ўзгартириш талаб этилмайди.

Мазкур қурилма нархи ҳозирча эълон қилинмаган, аммо дастлабки маълумотларга кўра, унинг қиймати 14–18,5 минг евро атрофида бўлиши мумкин. Компания кенг миқёсдаги ишлаб чиқаришни келаси йил кузида бошлашни режалаштирмоқда.

Aircela компаниясининг кашфиёти экологик тоза, қулай ва нисбатан арзон ёқилғи ишлаб чиқариш имконини беради. Агар лойиҳа муваффақиятли натижа берса, у инсониятнинг қазиб олинадиган ёқилғига бўлган эҳтиёжини сезиларли даражада камайтириши мумкин.