Ижтимоий тармоқларда янги Damas кўриниши қандай бўлиши билан боғлиқ хабарлар тарқалган эди. “Ўзавтосаноат” “Дарё” сўровига кўра бу масалада изоҳ берди.
“Янги модель мақсадли истеъмолчиларнинг истак ва эҳтиёжларини инобатга олган ҳолда танланади. Айни пайтда техник хусусиятларнинг маҳаллий фойдаланиш шароитларига мослиги, ишончлилиги ва қулайлиги бўйича потенциал автомобиль моделлари ўрганилмоқда”, дейилади компания изоҳида.
Қайд этилишича, юқоридаги мезонларга жавоб берадиган модель аниқланиб, тасдиқлангач, ушбу модел Ўзбекистонда ишлаб чиқарилиши ҳақидаги маълумотлар расмий ахборот манбаларида эълон қилинади.
Шавкат Мирзиёев 2 май куни бўлиб ўтган йиғилишда Хоразм вилояти Тупроққалъа туманида ҳозирда Damas ва Labo ишлаб чиқарилаётган заводда янги русумдаги автомобиль ишлаб чиқарилишини айтганди.
“Бозорда катта талабга эга арзон автомобиль ишлаб чиқариш бошланади”, деган эди давлат раҳбари.
Автомобиль Евро-5 экологик стандартига жавоб беради, 7 ўриндиққа эга бўлади.
Ижтимоий тармоқларда Chevrolet N400 суратлари тарқалиб, Ўзбекистонда янги ишлаб чиқариладиган Damas шундай кўринишда бўлиши айтилганди. Chevrolet N400 Эквадорда оммалашган йўловчи ташиш модели бўлиб, у 640 кг юк кўтариш қобилиятига эга ва 7 тагача йўловчини ташиши мумкин.
Ўзбекистонда Damas 1996 йилнинг март ойидан Андижон вилояти Асака туманидаги автомобиль заводида ишлаб чиқарила бошлаган. 2006 йилдан корхона унинг янгиланган версиясини ишлаб чиқарди, 2014 йилдан эса ишлаб чиқариш Хоразм вилоятига кўчирилди. Ўзбекистонда 2024 йилда 101,9 минг донадан ортиқ Damas ишлаб чиқарилган бўлиб, бу 2023 йилга (89,1 минг) нисбатан 14,3 фоизга кўпдир.
Изоҳ (0)