Италиялик рассом Салваторе Гарау Io Sono (“Мен борман”) номли кўринмас ҳайкалини 18 минг долларга сотди. Бу ҳақда Independent хабар бермоқда.
“Номоддий санъат асари” деб таърифланган ушбу асар Art Rite аукционида сотувга қўйилган.
Харидор нафақат ноёб санъат асарини, балки ҳақиқийлик сертификатини ҳам қўлга киритган. Бундан ташқари, унга ҳайкални тўсиқлардан холи, икки метрга икки метр ўлчамдаги майдонга жойлаштириш тавсия этилган.
Ҳайкал мутлақо кўринмас бўлса-да, Гарау унинг ғоясини физик ва фалсафий тушунчалар орқали изоҳлади. Унинг айтишича, ҳатто вакуум ҳам мутлақ “йўқлик” эмас. Гейзенбергнинг ноаниқлик тамойилига кўра, бўш фазо заррачаларга, шу жумладан одамларга айланиши мумкин бўлган энергия билан тўлган.
Бу Гарау яратган биринчи кўринмас санъат асари эмас. Илгари у Миландаги йўлакда тўртбурчак тасма билан белгиланган, медитация қилаётган Будданинг кўринмас тасвирини намойиш этган эди.
“Сиз уни кўрмайсиз, лекин у мавжуд. У ҳаво ва руҳдан яратилган”, дея изоҳ берди рассом.
Изоҳ (0)