Little Car Company компанияси афсонавий Ferrari 250 Testa Rossa’нинг кичрайтирилган нусхасини тақдим этди. Ёш ҳайдовчилар учун мўлжалланган спорткар Италия маркасининг оригинал чизмаларига асосланган бўлиб, интерьерни яратишда ҳам ҳақиқий автомобилдагидан фойдаланилган. Бундан ташқари, болалар учун мўлжалланган модель электродвигатель билан жиҳозланган бўлиб, бунинг ёрдамида у соатига 60 километр тезликда ҳаракатлана олади, деб хабар беради Motor.
Оригинал Ferrari 250 Testa Rossa модели 1957 йилдан 1958 йилгача ишлаб чиқарилган. Модель спорткарлар ўртасидаги Жаҳон чемпионатида (WSCC) ўн маротаба, шунингдек, конструкторлар ўртасида уч марта ғолибликни қўлга киритган бўлиб, марка тарихидаги энг муваффақиятли пойга автомобилларидан бири ҳисобланади. Италиялик конструкторлар жами 40 га яқин спорткарни яратган бўлиб, ҳозирда аукцион орқали уларнинг ҳар бири ўнлаб миллион долларга баҳоланади.
Спорткарнинг болалар учун мўлжалланган версияси 3100 миллиметрли алюминий кузов, Brembo тормоз дискалари ва Pirelli покришкаларига эга бўлган. Кичрайтирилган Testa Rossa тўлиқ ёруғлик техникаси билан жиҳозланган. Муҳандислар салонини безашда оригинал Ferrari’да фойдаланилган табиий чарм ва қурилмалар панелидан фойдаланган. Бундан ташқари, мутахассислар онлайн-конфигуратор ҳам яратган бўлиб, унинг ёрдамида кузов рангини танлаш ва Ferrari 250 Testa Rossa чемпионатларда қатнашган тарихий ранглар билан безаш ҳам мумкин.
16 от кучини тақдим этишга қодир электромоторга эга митти спорткар тўртта режимда — Novice, Comfort, Sport ва Race ишлай олади. Базавий модификацияда электрокар соатига 20 километр тезликда ҳаракатлана олади. Аммо спорт режимида тезлиги соатига 60 километрга етиши мумкин. Бундан ташқари, «ота-она назорати» режими ҳам бўлиб, у орқали кучли режимларни ўчириб қўйиш мумкин.
Фирма Ferrari 250 Testa Rossa’нинг жами 299 та нусхасини яратади, модель нархи ҳозирча номаълум.
Аввалроқ Lego 400 минг деталдан иборат тўлиқ ўлчамли Lamborghini Sian гиперкарини намойиш этгани тўғрисида хабар берилганди.
Изоҳ (0)