Italiyalik rassom Salvatore Garau Io Sono (“Men borman”) nomli ko‘rinmas haykalini 18 ming dollarga sotdi. Bu haqda Independent xabar bermoqda.
“Nomoddiy san’at asari” deb ta’riflangan ushbu asar Art Rite auksionida sotuvga qo‘yilgan.
Xaridor nafaqat noyob san’at asarini, balki haqiqiylik sertifikatini ham qo‘lga kiritgan. Bundan tashqari, unga haykalni to‘siqlardan xoli, ikki metrga ikki metr o‘lchamdagi maydonga joylashtirish tavsiya etilgan.
Haykal mutlaqo ko‘rinmas bo‘lsa-da, Garau uning g‘oyasini fizik va falsafiy tushunchalar orqali izohladi. Uning aytishicha, hatto vakuum ham mutlaq “yo‘qlik” emas. Geyzenbergning noaniqlik tamoyiliga ko‘ra, bo‘sh fazo zarrachalarga, shu jumladan odamlarga aylanishi mumkin bo‘lgan energiya bilan to‘lgan.
Bu Garau yaratgan birinchi ko‘rinmas san’at asari emas. Ilgari u Milandagi yo‘lakda to‘rtburchak tasma bilan belgilangan, meditatsiya qilayotgan Buddaning ko‘rinmas tasvirini namoyish etgan edi.
“Siz uni ko‘rmaysiz, lekin u mavjud. U havo va ruhdan yaratilgan”, deya izoh berdi rassom.
Izoh (0)