Леонардо да Винчи чизган айиқ бошининг сурати рекорд қийматда — 8,9 млн фунтга сотилди

Леонардо да Винчи томонидан чизилган айиқ бошининг сурати Christie’s аукциони орқали 8,86 миллион фунтга сотилди, деб хабар беради Esquire.

Аукцион бошлангунига қадар айиқ бошининг хомаки чизмаси 8-12 миллион фунтга баҳоланган эди. У ўлчами 7 х 7 сантиметр бўлган пушти-сарғиш рангдаги қоғозга кумуш игна ёрдамида чизилган. Леонардо да Винчига бу каби усулда сурат чизишни флоренсиялик рассом Андреа дел Веррокко ўргатган.

Тахминларга кўра, сурат 1480 йилларнинг биринчи ярмида чизилган. Бу дунёга машҳур рассомнинг хусусий коллекцияларда сақланаётган саккизта ишидан бири ҳисобланади.

Леонардо да Винчининг ижодига мансуб бундан олдинги рекорд 2001 йилда ўрнатилган эди — ўшанда «От ва чавандоз» сурати 8,1 миллион фунтга сотилган.

Эслатиб ўтамиз, 2020 йилнинг ноябрида Италияда Леонардо да Винчининг номаълум эскизи топилгани тўғрисида хабар берилганди. Леонардо да Винчи томонидан қизил бўрда чизилган сурат узоқ вақт хусусий коллексионерлардан бирида сақланган. Кейинроқ уни Италия шимолидаги Лекко шаҳрида яшовчи коллексионер сотиб олган.