Андижон вилоятининг Булоқбоши туманида 8 май куни Фарғона канали қирғоғи ўпирилиб, сув тошиб чиқди. Ҳолат акс этган видеолар ижтимоий тармоқларда тарқалди.
Унда сув катта тезликда қирғоқдан чиқаётганини, бунинг оқибатида ён-атрофдаги маҳаллаларни сув босганини кўриш мумкин.
ФВВ матбуот хизматининг маълум қилишича, Булоқбоши тумани “Сарвонтепа” МФЙ ҳудудидан оқиб ўтувчи Жанубий Фарғона канали қирғоқларининг бирига шикаст етгани натижасида маълум миқдорда сув сизиб чиққан.
Ушбу маълумот олиниши билан Норин-Қорадарё ирригация тизимлари бошқармаси томонидан сув буткул тўхтатилган. Ҳозирда Андижон вилояти ФВБ раҳбарияти томонидан керакли бўлган барча куч ва воситалар содир бўлган ҳодисани бартараф этиш учун жалб этилган ва вазият тўлиқ назоратга олинган.
“Ўзгидромет” матбуот хизмати ахборотига кўра, талофатлар ўрганилганда, жами 560 та хонадонни сув босгани маълум бўлди.
ФВВ матбуот хизмати ҳозирда вазирлик ва бошқа ҳамкор ташкилотларнинг техникалари ёрдамида сув оқимини пасайтириш ва кирган сувларни чиқариб ташлаш ишлари олиб борилаётганини билдирди.
“Ўзбекгидроэнерго” АЖ Жанубий Фарғона магистрал каналининг бош қисмида сув сарфи тўлиқ тўхтатилганини, ҳозирда масъуллар томонидан барча зарурий хавфсизлик чора-тадбирлари олиб борилиб, каналдаги сув оқимларини хавфсиз ўтказиш жараёнлари таъминланаётганини маълум қилди.
“Ҳудуд аҳолисини ортиқча ваҳимага берилмасликка ва хотиржамликка чақириб қоламиз”, дейилади хабарда
Андижон вилояти ҳокимлиги матбуот хизматининг хабар қилишича, ҳозирда вилоят ҳокими бошчилигидаги мутасадди ташкилотлар иштирокида ишчи гуруҳ ташкил қилиниб, ҳолат бартараф этилмоқда.
Барча керакли техника воситалари жалб қилиниб, жараён назоратга олинди.
Изоҳ (0)