Вазирлар Маҳкамасида Ўзбекистон бош вазири Абдулла Арипов раислигида тошқинга қарши комиссия йиғилиши бўлиб ўтди. Бу ҳақда Ўзбекистон ФВВ матбуот хизмати хабар бермоқда.
Йиғилишда Фавқулодда вазиятлар, Қишлоқ ва сув хўжалиги вазирликлари, «Ўзгидромет» маркази, Давлат геология қўмитаси раҳбарлари, Андижон, Жиззах, Қашқадарё, Самарқанд, Сурхондарё, Тошкент ва Фарғона вилоятлари ҳокимларининг ҳисоботлари, 2017 йилда сел, сув тошқини ва кўчки ҳодисаларининг хавфи башорати, мавсум давомида аҳоли ва ҳудудлар муҳофазасини ташкил этиш бўйича чиқишлар тингланди.
2016 йилда хавфли ҳудудлардаги дарёлар, сойлар ва каналлар ўзанларини тозалаш, қирғоқ ва дамбаларни мустаҳкамлаш мақсадида 99 маротаба тактик-махсус ўқув машқлари ўтказилди.
Аҳоли хавфсизлигини таъминлаш мақсадида Ички ишлар вазирлиги томонидан 69 та назорат-кузатув постлари ташкил этилди.
Йиғилишда 2017 йил баҳор-ёз мавсумида хавфли геологик ва гидрометеорологик ҳодисалар мониторингини кучайтириш, тошқин, сел ва кўчки хавфи мавжуд ҳудудларда истиқомат қилувчи хўжаликлар аҳолисини кўчириш, республика ва ҳудудий тошқинга қарши штаблар фаолиятини йўлга қўйиш каби кўплаб вазифалар белгилаб олинди.
Тошқинга қарши ҳукумат комиссияси қарори билан 2017 йилда дарё, сойлар ўзанлари ва қиғоқлари, гидротехника иншоотларида муҳандислик-техник ва бошқа ҳимоя тадбирларини амалга ошириш учун 62 миллиард сўм ажратилиши кўзда тутилмоқда.
«Дарё»нинг Telegram’даги расмий канали — @toshqindaryo’га аъзо бўлинг!
Изоҳ (0)