Madridning “Real” klubi transfer bozorida o‘zining strategiyasi bo‘yicha ishlashda davom etadi. Yaʼni klub so‘nggi yillarda yuqori narxlardagi transferlardan ko‘ra, yulduz futbolchilarni shartnomasi tugaganidan keyin erkin agent sifatida jamoaga olib kelishni yo‘lga qo‘ygan. Madridliklar bu safar “Liverpul” a’zosi Ibrohim Konateni o‘z safiga qo‘shib olish ustida ishlamoqda.
Ispaniyaning Marca nashri xabariga ko‘ra, “qaymoqranglilar” Ibrohim Konatening atrofidagi vaziyatni kuzatib turibdi. Klub ushbu futbolchini 2026-yilda, shartnomasi yakuniga yetgach, bepul qo‘lga kiritishni rejalashtirgan. “Real” Konateni uzoq muddatli loyihaga mos futbolchi sifatida ko‘rmoqda va uni Fransiya terma jamoasidagi sheriklari — Mbappe, Chuameni, Kamavinga va Mendi bilan tezda til topishib ketadi deya hisoblamoqda.
Madridliklar bu yondashuv orqali nafaqat transfer xarajatlarini kamaytirishni, balki barqarorlikni ta’minlashni ham maqsad qilgan. O‘tgan yozda “qaymoqranglilar” bu strategiyani ishga solib, “PSJ” hujumchisi Kilian Mbappeni erkin agent sifatida o‘z safiga qo‘shib olgandi.
Ma’lumot uchun, Konate joriy mavsum “Liverpul” tarkibida 39 uchrashuvda maydonga tushib, 2 gol hamda 2 assist muallifiga aylangan. Transfermarkt portali fransuz himoyachisining narxini 60 million yevroga baholamoqda.
Bundan tashqari, “Real” “Liverpul” himoyachisi Trent Aleksander-Arnold bilan ham kelishuvga erishgan. Ayni paytda “qirollik klubi” angliyalik futbolchi bilan Klublar o‘rtasidagi Jahon chempionatiga qadar shartnoma imzolashni istayotgani ma’lum qilingan edi.
Shuningdek, yaqinda “qaymoqranglilar” rahbariyati arzon-garov futbolchi qidirayotgani, shu bois “Bornmut” himoyachisi Milosh Kerkesh va “Benfika” futbolchisi Alvaro Fernandesh transferidan voz kechgani ma’lum qilindi.
Izoh (0)