2025 йил I чоракда Ўзбекистон бюджетига келиб тушган солиқлар ва уларнинг таркиби ҳақида маълумот берилди.
Умумий тушумлар
Солиқ қўмитаси ҳисоб-китобига кўра, уч ойда давлат ғазнасига 48,2 трлн сўм солиқ ундирилган (2024 йил мос давридагидан 19,6 фоиз ортиқ).
Энг йирик тушумларни фойда (11,8 трлн сўм), қўшилган қиймат (9,8 трлн сўм) ва аҳолидан олинадиган даромад солиқлари (9,3 трлн сўм) таъминлаган.
Шу билан бирга, акциз (4,5 трлн сўм), ер қаъридан фойдаланганлик учун (4,3 трлн сўм) солиқлар тушуми ҳам ортган. Сув ресурсларидан фойдаланганлик учун солиқ ва солиқсиз тушумлар миқдори юқори суръатда ўсиб (35 фоиз), 3,6 трлн сўмга етган.
Ишлаб чиқарувчилар қанча солиқ тўлади?
Январь—март ойларида ишлаб чиқариш билан шуғулланувчи 56 114 та корхона 20,6 трлн сўм солиқ тўлаган. Уларга қарийб 9,1 трлн сўмлик солиқ имтиёзлари берилган. Мазкур ҳисоб-китобларда мамлакатнинг энг йирик корхоналари — Навоий ва Олмалиқ кон-металлургия комбинатлари кўрсаткичлари инобатга олинмаган.
Қўмита рейтингида ишлаб чиқаришда энг кўп солиқлар “Ўзбекнефтгаз” АЖ томонидан тўланганини (863,3 млрд сўм) кўриш мумкин. Кейинги ўринларни “Узбат ОА” АЖ (619,7 млрд сўм), UzAutoMotors АЖ (413,2 млрд сўм) эгаллаган.
Хизматлар соҳаси кўрсаткичлари
Дастлабки чоракда хизмат кўрсатиш фаолияти билан шуғулланувчи 160 403 та корхона 9 трлн сўмдан ортиқ солиқ тўлади. Шундан 1,7 трлн сўмдан ортиғи (18,8 фоиз) 20 та тадбиркорлик субъекти ҳисобига тўғри келади. Улар тўлаган фойда солиғи нисбатан юқори улушни ташкил этган (573,1 млрд сўм).
Рейтингда мазкур бизнес тармоғида Асиа транс гас МЧЖ энг кўп солиқ тўлаганини кўриш мумкин (355,4 млрд сўм).
Кейинги ўринларни “Ўзбектелеком” АЖ (236,5 млрд сўм), “Ўзбекистон темир йўллари” АЖ (210,5 млрд сўм) ва Uzbekistan Airways АЖ (159,8 млрд сўм) эгаллаган.
Савдо ва қурилишда солиқ тушумлари
Январь–март ойларида савдо фаолияти билан шуғулланувчи 139 260 та корхона томонидан 8,6 трлн сўмдан ортиқ солиқ тўланган. Бу йўналишда энг кўп солиқ тўловчилар — Anglesey food МЧЖ (82,9 млрд сўм), Uzum Market МЧЖ ХК (72,4 млрд сўм), Total oil invest МЧЖ (63,6 млрд сўм) бўлган.
Уч ой ичида қурилиш соҳасидаги 28 336 та тадбиркорлик субъектидан эса 2,1 трлн сўм солиқ ундирилган. Рейтингда биринчиликни Discover invest МЧЖ (42,7 млрд сўм солиқ тўлаган) эгаллаган. Кейинги ўринларда Agromir buildings МЧЖ (39,9 млрд сўм) ва “Трест-12” АЖ (26,2 млрд сўм) қайд этилган.
Глобал бизнеслар тўлаган солиқлар
Жорий йил I чорагида Ўзбекистонда электрон хизматлар кўрсатувчи 68 та хорижий компания томонидан 36,2 млрд сўм солиқ тўланди. Бу 2024 йил мос даврига нисбатан 1,5 баробар кўп.
Солиқларнинг 94,5 фоизини қуйидаги 10 та компания тўлаган:
Apple — 10,6 млрд сўм;
Meta — 10,5 млрд сўм;
Google — 8,9 млрд сўм;
OpenAI — 1,1 млрд сўм;
TikTok — 934,8 млн сўм;
Booking.com — 542,7 млн сўм;
Netflix — 467,6 млн сўм;
Zoom — 432,6 млн сўм;
Аccа — 427 млн сўм;
Хsolla — 235,6 млн сўм.
2024 йилда давлат бюджетига 199,1 триллион сўм солиқ ундирилган эди. Жорий йил 1 апрель ҳолатига кўра, республикада тўланмаган солиқ қазрдорликлари миқдори 8,5 триллион сўмга етган.
Изоҳ (0)