Тему Ўзбекистонда 46 млрд сўм солиқ тўлаши керак. Бу ҳақда АОКАда бўлиб ўтган матбуот анжуманида солиқ қўмитаси раисининг биринчи ўринбосари Мубин Мирзаев маълум қилди.
Мубин Мирзаевнинг айтишича, ҳозирги кунда кўплаб мамлакатларда энг катта масала — маркетплейс ёки электрон савдо тизимларини солиққа тортиш бўлиб турибди.
“Биз интернет орқали савдо қилиш тизимини тўлиқ таҳлил қилдик. Таҳлиллар натижасида жуда кўплаб электрон савдо қиладиган ташкилотлар солиқ тўламаслик ҳолатларини аниқлади. Нафақат Temu, балки Wildberries ташкилоти ҳам солиқ тўламай юрган эди. Бу ерда савол туғиляпти, нима учун айнан Temu? Биз барча электрон платформаларга солиқ мажбуриятларини бажариш бўйича огоҳлантириш хатини берганмиз”, дейди у.
Солиқ қўмитаси раисининг биринчи ўринбосари Wildberries 52 млрд сўм солиқ тўлаб берганини эслаб ўтди.
“Кейин бизда ҳеч қандай эътироз йўқлиги ҳақида хулосамизни бердик. Тему бўйича дастлабки ҳисоб-китобларга кўра, 46 млрд сўмлик солиқ тўланмагани аниқланди. Биз эътироз хати қилиб берганмиз уларга. Қачон солиқни тўласа уларнинг фаолиятини қонунийлаштириб берамиз”, деди Мубин Мирзаев.
Temu’нинг блокланиши
Ўзбекистонда Temu платформасидан фойдаланиш 2025 йил 20 мартдан бошлаб чекланиши ҳақида хабар берилганди. Кейинроқ Temu маркетплейси юридик шахс — Ўзбекистон Республикаси резиденти сифатида рўйхатдан ўтган эди.
Вазирлар Маҳкамасининг 2024 йил 26 декабрдаги “Ўзбекистон Республикасида электрон тижорат соҳасини янада ривожлантириш чора-тадбирлари тўғрисида”ги қарорининг 2-банди билан электрон тижорат операторлари, хусусан, электрон савдо платформалари операторлари сифатида фақат юридик шахслар — Ўзбекистон резидентлари фаолият юритиши мумкинлиги белгиланган.
“Дарё” 2024 йил декабрида электрон тижорат вакиллари — Ўзбекистон “Sellerlar” уюшмаси раиси Тимур Рашидов, Uzum Market МЧЖ ХК сотувчиси Муҳаммаджон Муроджонов ҳамда иқтисодчи Отабек Бакиров билан суҳбатлашганида Temu платформасига ҳам тўхталиб ўтилганди.
Тимур Рашидов чет эл маркетплейсларида суратда ёки видеода кўрсатилган маҳсулот бошқачароқ бўлиб чиқиши мумкинлиги, аммо истеъмолчи ўзига ёқмаган товарни қайтариб бера олмаслигини айтиб ўтганди.
Изоҳ (0)