O‘zbek milliy raqs sanʼatining yuksak namunasi bo‘lmish “Lazgi — Muhabbat va qalb raqsi” balet spektakli dunyo sahnalarini zabt etishda davom etmoqda. Bu haqda O‘zbekiston prezidenti yordamchisi Saida Mirziyoyeva o‘zining Telegram dagi kanaliga yozib qoldirdi.
Qayd etilishicha, 10-sentabr kuni Rossiya Katta teatrida balet premyerasi bo‘lib o‘tgan.
“Mamlakatlarimizning yangi tarixida bu haqiqatan ham muhim voqea. UNESCO ning insoniyat nomoddiy madaniy merosi ro‘yxatiga kiritilgan qadimiy Xorazm raqsi — lazgiga bag‘ishlangan spektakl tomoshabinlarni raqsga va hayotning o‘ziga bo‘lgan muhabbat tarixi bilan yaqindan tanishtiradi”, — deb yozadi Saida Mirziyoyeva.
Eslatib o‘tamiz, 2021-yilda Saida Mirziyoyeva boshchiligidagi Madaniyat va san’atni rivojlantirish jamg‘armasi tomonidan Jahon merosi ro‘yxatiga kiritilgan lazgi raqsi balet ko‘rinishida sahnalashtirilgandi. 2022-yil 28–29-iyun kunlari “Lazgi” baleti Bursa shahridagi Merinos Otaturk sahnasida namoyish etilgan.
“Lazgi” Xorazm raqsi O‘zbekiston madaniy merosining elementi sifatida Insoniyatning nomoddiy madaniy merosi reprezentativ ro‘yxatiga kiritilgan. Bu haqdagi qaror 2019-yil 12-dekabr kuni UNESCO’ning Nomoddiy madaniy merosni muhofaza qilish bo‘yicha hukumatlararo qo‘mitasining 14-sessiyasida qabul qilingan.
Izoh (0)