Pekinda mashhur “Lazgi. Muhabbat va qalb raqsi” balet spektakli namoyishi bo‘lib o‘tdi. Bu haqda prezident yordamchisi Saida Mirziyoyeva ma’lum qildi.
Qayd etilishicha, ushbu premyera Xitoy milliy opera teatri sahnasida O‘zbekiston Madaniyat va sanʼatni rivojlantirish jamg‘armasi ko‘magida tashkil etilgan.
Uch yillik gastrol safarlari davomida “Lazgi. Muhabbat va qalb raqsi” spektakli Dubay, Istanbul, Bursa, Dortmund, Moskva, Parij va Sankt-Peterburgda tomoshabinlar olqishiga sazovor bo‘lgan.
“Xoreograf Raimondo Rebekning yuksak mahorati hamda O‘zbekiston Milliy baleti truppasining hissiyotlarga boy ijrosi sababli qadimgi raqs yangi talqinda yog‘du sochdi.
Xorazm zaminida ming yillar davomida qadr topgan lazgi raqsi xalq ijodkorligining cheksiz imkoniyatidan hikoya qiluvchi o‘ziga xos dostondir. Lazgi – ijrochining har bir harakati, har bir imo-ishorasi, o‘tli nigohi o‘zbek madaniyatining boy tarixi va bemisl go‘zalligiga, qolaversa, ajdodlarga ehtirom timsoli sifatida namoyon bo‘ladigan lahzalardir”, — deb yozadi Mirziyoyeva.
Pekinda namoyish etilgan spektakl Xitoyda O‘zbekiston madaniyati kunlari doirasida taqdim etilgan. Prezident yordamchisi yuqori darajada tashkil etilgan ushbu badiiy bayram uchun chuqur minnatdorligini bildirgan.
Ayni vaqtda prezident Shavkat Mirziyoyev rafiqasi bilan birga davlat tashrifi bilan Xitoy bo‘lib turibdi. Bugun davlat rahbari XXR Davlat kengashi bosh vaziri Li Syan bilan hamda Butunxitoy qo‘mitasi raisi bilan uchrashuv o‘tkazdi.
Izoh (0)