“Америкадаги ўзбекистонликларда ҳам топилган пулни кераксиз нарсага аямай сарфлаш одати бор” — Навбаҳор Имомова тўй қилиш маданияти ҳақида гапирди

“Дарё” интернет-нашри Тошкент шаҳри ҳокимлиги қошидаги Жамоатчилик кенгаши билан биргаликда “Маҳалла. Муаммо. Мулоҳаза” лойиҳасини тақдим этиб келмоқда. Лойиҳанинг 17-сони мавзуси “Америкада Ўзбекистон овози” бўлиб, дастур меҳмони сифатида “Америка овози” журналисти Навбаҳор Имомова таклиф этилди.

— Инсон ким бўлишидан қатъи назар, бир мамлакатдан иккинчисига борар экан, ўз қадриятлари билан бирга иллатларини ҳам олиб боради. Шундай иллатлар борки, уларни разиллик, уят, нотўғри, деймиз. Лекин яна шундай иллатлар бор, масалан, дастурхонга ҳаддан ортиқ кўп овқат тортиш, жуда ортиқча меҳмондорчилик қилиб юбориш ёки вақтни қадрламаслик, бошқаларнинг вақти, режаси устидан қарорлар қилиш кабилар америкаликларга ёқмайди. Мен сиз билан маслаҳатлашмасдан ниманидир белгиламайман. 

Мисол учун, америкалик жуфтлик тўйини режалаштираётган бўлса, аввало, ўзи танлаган 15–20 нафар меҳмонга хабар беради. “Тўйимизни келаси йил март ойида Гавайида ўтказишни режалаяпмиз, кела оласизми? Олдиндан шу кунни календарингизга белгилай оласизми?” — деб сўрашади. Ҳа ёки йўқ десам ҳам, аниқ бориш-бормаслигимга кафолат беролмайман. Лекин бу улар учун муҳим, чунки сиз танланган 15 нафар эксклюзив меҳмондан бирисиз, боролмасангиз, ўрнингизга бошқаси танланади. Бу сизнинг ишончингизга, ўзаро иззат-ҳурматга асосланган келишув ҳисобланади. 

Ўзбекистонликларнинг тўйлари эса бундай эмас, ҳар икки ҳафтада бир тўй, келишингиз керак. Буни иллат демоқчи эмасман-ку, маслаҳатлашмай қилинадиган иш дейиш мумкин. Одамлар бу менинг тўйим, шахсий ишим, билганимни қиламан, деб айтиши мумкин. 

Ўзбек бўлмаган америкаликларнинг тўйлари ҳам қиммат. Масалан, яхши тўй қиламан десангиз, Қўшма Штатларда ҳам 50–60 минггача (АҚШ доллари — таҳр.) сарфлашингиз мумкин. Шундай бўлишига қарамай, пулни асосан, ўзингизга, асал ойига, чиройли кошона, курорт ёки соҳил бўйида тўй қилсангиз, жойнинг ўзига, кийимлар, торт, безакларга сарфлайсиз. Булар барибир ўзингизда қолади. 

Америкадаги ўзбекистонликларда эса бошқача ҳолат: топилмаган пулни аямаслик, кераксиз нарсаларга сарфлаш одати уларда ҳам бор. Лекин Америкада ундан ҳам муҳимроқ муаммо — келин ёки куёв топиш. Ўзбеклар барибир келиним, куёвим ўзимдан бўлсин, дейди. Буни ёши ўтган сари одамлар яхшироқ тушунади, миллатим насли давом этсин, она тилимни биладиган инсон билан турмуш қурай, деган хоҳиш бор. Бу ҳамма миллат вакилларига хос ўй-фикрлар, — дейди Навбаҳор Имомова.