“Такрор ва такрор айтаман: биз очиқлик сиёсатини, сўз эркинлиги ғояларини ҳаётга татбиқ этишда ҳамиша қатъий бўламиз!” — президент

Ислоҳотлар йўлидаги энг катта тўсиқ ва ғов бу коррупциядир. Бу ҳақда Шавкат Мирзиёев 5 март куни коррупциянинг олдини олиш бўйича ишлар натижадорлиги ва келгусидаги устувор вазифаларга бағишланган кенгайтирилган йиғилишда айтиб ўтди.

Давлат раҳбари сўзининг аввалида ислоҳотлар ҳал қилувчи босқичга кираётган ҳозирги вақтда мамлакатда коррупциядан холи муҳит яратиш бўйича ишларга баҳо бериб, келгуси вазифаларни аниқ белгилаб олиш зарурлигини таъкидлади.

“Коррупция шундай ёвуз иллатки, у халқнинг давлатга, Конституция ва қонунларга ишончига путур етказади, барқарор ривожланиш ва хавфсизлик учун жиддий таҳдидга айланади”, деди президент.

Шавкат Мирзиёев ислоҳотлар йўлидаги энг катта тўсиқ ва ғов ҳам коррупция эканини, буни дунё тажрибаси ҳам тўлиқ тасдиқлашини таъкидлаб ўтди. Коррупция оқибатида жаҳон иқтисодиёти йилига 3 триллион доллар зарар кўраётгани бу глобал хавф эканидан далолат эканини қайд этди.

Йиғилишда Ўзбекистонда коррупциянинг олдини олиш ва унга қарши курашиш бўйича аниқ тизим яратилиб, алоҳида қонунлар қабул қилингани, Парламент палаталарида масъул қўмиталар, Коррупцияга қарши курашиш бўйича миллий кенгаш ва агентлик ташкил қилингани айтиб ўтилди.

Жамиятда коррупция муаммосини жамоатчилик муҳокамасига олиб чиқадиган очиқ тизим, очиқ муҳит яратилгани, айниқса, оммавий ахборот воситаларининг бу борадаги ўрни ва таъсири ортиб бораётгани қайд этилди. Илгари бу мавзу журналистлар учун мутлақо ёпиқ бўлгани, ҳозирги вақтда мавжуд ҳолат очиқлик ва шаффофлик томонга бутунлай ўзгаргани айтилди.

Очиқлик бўйича халқаро рейтинглардаги Ўзбекистоннинг ўрни 138 поғонага яхшиланиб, Марказий Осиёда биринчи, дунёда 30-ўринга кўтарилди.

“Такрор ва такрор айтаман: биз очиқлик сиёсатини, сўз эркинлиги ғояларини ҳаётга татбиқ этишда ҳамиша қатъий бўламиз!”, деди давлат раҳбари.