“Фенербаҳче” бош мураббийи Жозе Моуриньо Туркия Суперлигасининг 25-туридан ўрин олган “Галатасарой” билан баҳсдан (0:0) кейин билдирган фикрлари учун тўрт ўйинга дисквалификация қилинди. Бу ҳақида Sky TG24 нашри хабар бермоқда.
Манбага кўра, 62 ёшли португалиялик мутахассис икки ўйинлик дисквалификацияни ирқчиликка оид баёноти учун, яна икки ўйинлик жазони учрашувдаги тўртинчи ҳакамни ҳақорат қилгани учун олган.
Натижада Моуриньо “Фенербаҳче”нинг Туркия Суперлигаси доирасидаги тўртта — “Анталяспор”, “Самсунспор”, “Бодрум” ва “Трабзонспор”га қарши баҳсларни ўтказиб юборади.
Туркия футбол федерацияси берган маълумотга кўра, Моуриньо ҳакамларни ҳақорат қилгани учун 117,000 лира, рақиб жамоа аъзоларига нисбатан билдирган баёноти учун 1,500,000 лира жаримага тортилган.
Эслатиб ўтамиз, “Галатасарой” билан баҳс якунланганидан сўнг, Моуриньо рақиб жамоа заҳирадаги футболчилари ва мураббийлар штаби ўзини “маймунлардек тутганини” таъкидлаган эди.
Бу гаплар “Галатасарой” томонидан ирқчилик сифатида қабул қилинди ва клуб расмий баёнотида қуйидагича фикр билдирилди:
“Моуриньонинг Туркия халқига қарши билдирган фикрлари инсонийликдан йироқ”.
“Фенербаҳче” ушбу баёнотлар контекстдан юлиб олинганини таъкидлаб, Моуриньони тўлиқ қўллаб-қувватламоқда. Шу билан бирга, Моуриньонинг ўзи “Галатасарой” клубини туҳмат учун судга бериши мумкинлиги айтилмоқда.
Маълумот учун, Моуриньонинг олган жазоси фақат Туркия Суперлигасига тегишли бўлиб, у “Фенербаҳче”нинг Европа Лигаси доирасидаги “Рейнжерс”га қарши муҳим учрашувда жамоани бошқара олади.
Изоҳ (0)